Nashik News : मालेगाव तालुक्यातील रामपुरा येथील भटू मोतीराम खैरनार यांचा पाच हजार पक्षांच पोल्ट्री सेड दुपारी साडेबाराच्या सुमारास आलेल्या वादळात जमीनदोस्त झाला.

यामुळे सदर शेतक-याचे अठरा लाखांहून अधिक नुकसान झाले असून भरपाईची मागणी केली जात आहे.

काटवन परिसरातील रामपुरा येथील युवा शेतकरी भटू मोतीराम खैरनार हे (गट क्रमांक ४६) मध्ये कोरडवाहू पाच एकर क्षेत्रात कुक्कुट पालन करून आपल्या कुटुंबियांचा उदरनिर्वाह करीत आहेत. (Poultry shed for 5000 birds destroyed due to storm Nashik Rain Update news)

हेही वाचा : Credit Card फसवणूक....काय घ्याल काळजी?

दरम्यान याच पोल्ट्रीच्या एका बाजूस कुटुंबासहित वास्तव्य करीत आहेत. रविवार (ता.४) दुपारी साडेबाराच्या सुमारास मेघगर्जनेसह जोरदार आलेल्या वादळात होत्याचे नव्हते केले.

पाच हजार पक्षांचा पोल्ट्री सेड वादळात अलगद उडाल्याने श्री. खैरनार यांचे अतोनात नुकसान झाले. काल शनिवार (ता.३) रोजी नुकतेच पाच हजार पक्षी पोल्ट्रीत टाकले होते.

या कोवळ्या पक्षांचा जीव जातांना श्री. खैरनार कुटुंबियांना अश्रू अनावर झाले आहेत. तसेच संसार उघडय़ावर पडल्याने आता करावे तरी काय असा प्रश्न उपस्थित होत आहे. प्रशासनाने तातडीने पंचनामा करून भरपाई द्या अशी मागणी खैरनार कुटुंबातील सदस्यांकडून केली जात आहे.