नाशिक : सायकलिस्ट असोसिएशनतर्फे घेण्यात आलेली नाशिक ते धुळे व परत नाशिकपर्यंत ३०० किलोमीटर अंतराची ‘बीआरएम’ स्पर्धा सायकलिस्ट राहुल आहिरे यांने विविध संकटे पार करत नियोजित वेळेपूर्वीच पूर्ण केली.

फ्रान्समधील "Audax Club Parisien' या संस्थेतर्फे संपूर्ण जगभरात ही स्पर्धा घेण्यात येते. बीआरएम नावाने ओळखली जाणारी ही स्पर्धा नाशिक सायकलिस्ट असोसिएशनने स्थानिक पातळीवर घेतली. यामध्ये नाशिक-धुळे-नाशिक असा ३०० किलोमीटरचा प्रवास २० तासांत पूर्ण करणे आवश्‍यक होते. टाटा कन्सल्टन्सी सर्व्हिसेसमध्ये अभियंता असलेल्या सायकलिस्ट राहुलने स्पर्धेत सहभागी होत हा ३०० किलोमीटरचा प्रवास नियोजित वेळेपूर्वी एक तास अगोदर म्हणजे १९ तासांतच पूर्ण केला. या प्रवासात राहुल आणि त्याच्या सहकाऱ्यांनाही अनंत अडचणींचा सामना करावा लागला.

संकटांची मालिका सुरूच

स्पर्धेच्या नियमांनुसार जाताना चांदवड, धुळे आणि येताना द्वारका पॉइंट येथे वेळेपूर्वी पोचणे आवश्‍यक होते. त्यानुसार राहुलने पहिल्या टप्प्यात धुळे येथील पॉइंट पूर्ण केला. मात्र, दुसऱ्या टप्प्यात परतीच्या प्रवासात पाऊस, विरुद्ध दिशेने येणारे वेगवान वारे, अंधूक लाइट, चाक पंक्चर, रात्रीची वेळ असल्याने केवळ सायकलच्या दिव्याचा अपुरा प्रकाश अशी अनेक संकटे आली. यातच खड्ड्याचा अंदाज न आल्याने चांदवडजवळ त्याचा छोटा अपघातही झाला. तेव्हा तर आता आपण स्पर्धा पूर्ण करू शकणार नाही, अशा नकारात्मक भावनाही त्याच्या मनात उद्‌भवल्या.

अडथळा थेट पंक्चरचाच

अशाही अवस्थेत स्पर्धा वेळेत पूर्ण करायचीच, असा निर्धार करत त्याने पुन्हा जोमाने प्रवास सुरू ठेवला. द्वारका पॉइंट अवघे ३५ किलोमीटरवर असतानाच पिंपळगावजवळ त्याची सायकल पंक्चर झाली. तेव्हा सीटवर न बसता उभे राहून केवळ पुढील चाकावर जास्त भार देऊन सायकल चालवली. काही वेळाने अन्य काही स्पर्धक जेव्हा जवळ आले, तेव्हा त्यांच्याकडील हॅन्डपंपाद्वारे सायकलच्या चाकात हवा भरत पुढील प्रवास सुरू ठेवला. अशा सर्व संकटांवर जिद्दीने मात करत राहुलने परतीचा प्रवास ५ तास ५० मिनिटांत पूर्ण करत स्पर्धा यशस्वीरीत्या पूर्ण केली. रात्री एक वाजून दोन मिनिटांनी राहुल अंतिम पॉइंटवर पोचला. तब्बल एक तासाची वेळ राखून त्याने ही स्पर्धा पूर्ण केली.

''तीनशे किलोमीटरचा सायकल प्रवास मला खूप काही शिकवून गेला. आयुष्यातदेखील आपल्याला अनेक अडचणींना सामोरे जावे लागते. परंतु, हिंमत न हारता प्रामाणिक प्रयत्न करत राहिलो. त्यामुळे ही स्पर्धा पूर्ण करू शकलो. त्यातून इच्छाशक्ती असेल तर नक्कीच यश मिळते, याचाच प्रत्यय आला.'' - राहुल आहिरे, सायकलिस्ट