Nashik News : नाशिक महानगरपालिकेच्या तिजोरीतून नगरसेवक दरवर्षी लाखो रुपये रस्ते दुभाजक, दुरुस्ती आणि सुशोभीकरणाच्या नावाखाली खर्च करत असतात.

पण ते टिकविण्याची जबाबदारी मात्र कोणीही स्वीकारत नाही हे वास्तव चित्र सध्या शहरातील अनेक भागात दिसून येत असून मखमलाबाद नाका ते पेठ फाटा या रस्त्यावरील रेलिंग अक्षरशः गायब झाले आहेत. (Railing missing from Makhmalabad Naka to Peth Fata road Nashik News)

हेही वाचा : Credit Card फसवणूक....काय घ्याल काळजी?

प्रभाग पाच मध्ये मखमलाबाद नाका ते पेठ फाटा परिसरातील पेठकर प्लाझा इमारत समोरील रस्त्याच्या दुभाजकातील जवळपास दोनशे ते तीनशे फुटाचे लोखंडी जाळ्या चोरीला गेल्याचे दिसत आहे.

तशीच परिस्थिती पेठरोड भागातील लोखंडी दुभाजकांमधील असून काही ठिकाणी संपूर्ण जाळ्या तर काही ठिकाणी जाळ्यांमधील लोखंडी पाइप चोरी गेल्याचे पाहायला मिळत आहे. या चोरी गेलेल्या जाळ्यांमुळे परिसराची शोभा बाधित होते आहे.

मात्र या जाळ्या चोरीला कशा गेल्या, कधी चोरीला गेल्या याचे कोणतेही सोयरे सुतक हे ना प्रभागातील लोकप्रतिनिधींना आहे ना मनपा प्रशासनाला. अजून मनपाकडून एकही शासकीय मालमत्तेची वस्तू चोरीला गेल्याबाबत पोलिसांत तक्रार किंवा गुन्हा दाखल करण्यात आलेला नाही.