नाशिक : २०२२-२३ या आर्थिक वर्षासाठीचे महसुली उद्दिष्ट साध्य करण्यात जिल्हा प्रशासनाला यश आले आहे. महसुली उद्दिष्ट साध्य करण्याचे जिल्हा प्रशासनाचे हे चौथे वर्ष असून, सुमारे २२८ कोटींचा महसुल संकलित केला आहे.

शासनाने दिलेल्या उद्दिष्टाच्या ११८ टक्के वसुली जिल्हा प्रशासनाने करीत मार्चएण्डपूर्वीच उद्दिष्ट साध्य केले आहे. (Revenue target successful 118 percent revenue collection in March end before Nashik News)

मार्च महिन्यात बँकांसह शासकीय-निमशासकीय कार्यालयांमध्येही आर्थिक वर्षाचा ताळेबंद लावण्यासाठी धावाधाव सुरू असते. जिल्हाधिकारी प्रशासन कार्यालयात मात्र गेल्या चार वर्षांपासून मार्चएण्डपूर्वीच उद्दिष्ट साध्य करण्याची परंपरा यंदाही कायम राहिली आहे.

त्यामुळे आर्थिक वर्षात प्रशासनाने १०० टक्के महसुल वसुली करीत सलग चौथ्यावर्षी विभागात अव्वल स्थान पटकावले आहे. यंदा राज्य शासनाने जिल्हा प्रशासनाला १९३ कोटी ५५ लाखांच्या महसुली वसुलीचे उद्दिष्ट दिले आहे.

यात गौणखनिजच्या ९८.१६ कोटी, तसेच जमीन महसुलच्या ९५.५० कोटी रूपयांचा समावेश आहे. जिल्हा प्रशासनाने मार्चएण्डला तीन दिवस शिल्लक असतानाच, तब्बल २२८ कोटी ५० लाख ५९ हजारांचा महसुल शासनाच्या तिजोरीत जमा केला आहे.

हेही वाचा : जीएसटीसाठी नोंदणी केलीच नाही तर??

यात, गौण खनिजचे १५५ कोटी ७३ लाख १६ हजार रूपये. जमीन महसुल वसुली ७२ कोटी ७७ लाख ४२ हजार रूपये आहेत. शासन स्तरावरून गौण खनिजपोटी देण्यात आलेल्या उद्दिष्टाच्या १५८ टक्के तर, जमीन महसुलची ७६.२० टक्के वसुली जिल्हा प्रशासनाने गाठली.

जिल्ह्यात सिन्नर आघाडीवर

जिल्हा प्रशासनाच्या महसुल वसुलीच्या यादीत सिन्नर तालुका अव्वलस्थानी राहिला आहे. तालुक्याला २६.६६ कोटींचे उद्दिष्ट असताना, प्रशासनाने ४०.९८ कोटींची म्हणजेच तब्बल १५४ टक्के महसुल संकलित केला आहे.

तर, निफाड तालुक्यात सर्वात कमी १५.०८ कोटीपैकी अवघी २० टक्के वसुली झालेली आहे. दरम्यान, नाशिक तालुक्यात ९९ टक्के वसुली झाली असून, दिंडोरी, त्र्यंबकेश्‍वर व नांदगाव तालुक्यांनीही उद्दिष्ट गाठले आहे.