नाशिक : नाशिक ही पवित्र जागा असली तरी हल्ली नाशिकमध्ये टोकन देण्याच्या प्रकारात वाढ झाली आहे. रेट कार्डनुसार घाऊक प्रवेश होत आहेत. प्रथम ऑर्डर दिली जाते, व्यापारात जसे टोकन दिले जाते तसे राजकारणात काही लोकांना टोकन दिले जाते.

मग आमच्या नाशिक दौऱ्याचा मुहूर्त बघून प्रवेश सोहळे होतात, अशी उपरोधिक टीका संजय राऊत यांनी शिंदे गटाचे नाव न घेता केली. (Sanjay Raut criticism on Shinde Group on nashik daura political news)

खासदार राऊत नाशिकचा दौरा आटोपून मुंबईकडे परतताना माध्यमांशी त्यांनी संवाद साधला. ते म्हणाले, ‘भाजपच्या कार्यकारिणीच्या बैठकीत नाशिकमध्ये कमळच फुलणार असा नारा दिला गेला; परंतु नाशिकमध्ये भगवाच फडकणार व आम्ही फडकवून दाखवू. शिवसेनाप्रमुख बाळासाहेब ठाकरे यांचे नाशिकवर जिवापाड प्रेम होते.

मात्र आता गिरीश महाजन यांच्यासारख्यांनी नाशिकची जी परिस्थिती केली, त्यामुळे नाशिककरांना वीट आला आहे. नाशिक ही पवित्र जागा आहे. येथे रामतीर्थामध्ये पापक्षालन केले जाते, पण आम्ही या भाजपला देखील इथेच बुडवू.

राज्याचे उपमुख्यमंत्री देवेंद्र फडणवीस हे सध्या सातत्याने महाविकास आघाडी सरकारच्या काळात मला अटक करण्याचे कारस्थान रचल्याचे सांगत आहेत. अटक झाल्यानंतर त्यांना प्रकाशझोतात यायचं होतं; परंतु त्यावेळचे मुख्यमंत्री उद्धव ठाकरे सभ्य व सुसंस्कृत होते. त्यामुळे ही संधी फडणवीसांना मिळाली नाही.

हेही वाचा : अल्पमतातील निवाडे आणि सामान्य माणूस

शिवनेरीवर या, पण...

केंद्रीय गृहमंत्री अमित शहांना महाराष्ट्रात छत्रपती शिवाजी महाराजांचा आशीर्वाद लाभणार नाही. छत्रपती शिवाजी महाराजांचा अपमान करणाऱ्या राज्यपालांचे त्यांनी शेवटपर्यंत समर्थन केले आहे, त्यांच्या अभिनंदनाचा ठराव देखील मंजूर केला.

महाराष्ट्रातला समाज त्यांना पाठिंबा देईल असे वाटत असेल, तर तो त्यांचा गैरसमज आहे. शिवनेरीवर जरूर जावे व छत्रपती शिवाजी महाराज ज्या मातीत जन्मले त्या मातीतून जर काही पवित्र गोष्टी घेता आल्या तर त्या घेऊन जा, असा सल्लाही दिला.