अंबासन : सटाणा ते रावळगाव रस्त्यावरील अजमेर सौंदाणे ते देवळाणे रस्त्याची अवस्था दयनीय झाली आहे.

रस्त्याची डागडुजी न करता संबंधित विभागाने कायमस्वरूपी तोडगा काढावा, थातूरमातूर, निकृष्ट काम होऊ देणार नाही असा आक्रमक पवित्रा देवळाणे, सुराणे व वायगाव येथील ग्रामस्थांनी घेतला आहे. आमदार, खासदारांनी तरी या निकृष्टतेची दखल घ्यावी अशी मागणी ग्रामस्थांनी केली आहे. (Satana Rawalgaon road waiting Aggressive villagers Nashik)

रावळगाव, सातमाने, माळीनगर, दुंधे, वायगाव, सुराणे, देवळाणे या गावांना शहराशी जोडणा-या रस्त्यावर ठिकठिकाणी खड्डेच खड्डे पडलेले आहेत. त्यातून जीन मुठीत घेत वाहनचालकांना करावा लागत आहे.

रामतीर फाट्यावरील खड्डे बुजविण्यासाठी मशिनरी दाखल झाली, पण काम अतिशय निकृष्ट होत असल्याचा आरोप नागरिकांकडून होत आहे. अजमेर सौंदाणे ते देवळाणे रस्त्यावरील खड्ड्यांबाबत अनेक वेळा संबंधित विभागाकडे तक्रार करूनही दखल घेतली जात नसल्याने संतप्त प्रतिक्रिया नागरिकांकडून उमटत आहेत.

रस्त्यावरील थातूरमातूर डागडुजी खपवून घेतली जाणार नाही असा आक्रमक पवित्रा संतप्त नागरिकांनी घेतला आहे. संबंधित विभागाने कायमस्वरूपी रस्त्यावरील खड्ड्यांबाबत तोडगा काढावा अशी मागणी नागरिकांकडून केली जात आहे.

दरम्यान या रस्त्यावरील काम लवकरच पूर्ण केले जाईल अशी ग्वाही बांधकाम विभागाकडून देण्यात आली आहे.

"अजमेर सौंदाणे ते रातीर फाट्यावर रस्त्यावरील डागडुजी सुरू आहे, मात्र ही डागडुजी फक्त देखावा आहे. कामे निकृष्ट होत आहे. बस खड्ड्यातून धावताना बिघडतात, यामुळे विद्यार्थ्यांचे शैक्षणिक नुकसानही होते. आमच्या शेतातील माल वाहतुकीलाही प्रचंड अडचणी निर्माण होत आहेत. आम्ही दाद मागावी तरी कुणाकडे?"- दीपक ठोके, माजी सरपंच सुराणे.

"रस्त्याच्या डागडुजीचे काम अतिशय निकृष्ट दर्जाचे होत आहे. याबाबत आम्ही वायगाव, सुराणे व देवळाणे ग्रामपंचायतीमार्फत बांधकाम विभागाकडे तक्रार करणार आहोत. नेहमीच दुरुस्ती व थातूरमातूर डागडुजी करून शासनाने कायमस्वरुपी रस्त्याचे चांगले काम करावे."

- अशोक आहिरे, सरपंच वायगाव.

"सटाणा रावळगाव रस्ता रहदारीचा व वर्दळीचा आहे. खड्डे वाचविण्याच्या नादात अपघातासाठी हॉटस्पाॅट बनत चालला आहे. वारंवार रस्ता दुरुस्तीची मागणी केली जात आहे. डागडुजीच्या नावाने मशिनरी पाठविले जाते, दहा खड्डे सोडायचेत आणि कुठेतरी दुरुस्ती करायची असा प्रकार सुरू आहे. कामाची चौकशी व्हावी अशी आमची व ग्रामस्थांकडून मागणी आहे."

- नितीन देवरे, ग्रामस्थ सुराणे.

"या रस्त्याची दर दोन वर्षांनंतर डागडुजी होते. मग हा रस्ता खराबच कसा होतो. आज अशी अवस्था झाली आहे, की रस्त्यावरून कसे जावे हा प्रश्न पडतो शासनाकडून त्याची दखल घेतली जात नाही. तक्रार करूनही तोंडाला पाने पुसण्याचे काम केले जात आहे."

- सुभाष भदाण, ग्रामस्थ देवळाणे.