नाशिक : स्टोन क्रशर साइटमधील काही लोकांना हाताशी धरून तेथील अडीच कोटी रुपयांचे गौण खनिज चोरून त्याची परस्पर विक्री करणाऱ्या पाथर्डी येथील तिघा भावांवर वाडीवऱ्हे पोलिस ठाण्यात ठकबाजीचा गुन्हा दाखल झाला आहे.

पैशांबद्दल विचारातच ठार मारण्याची धमकी

प्रल्हाद पिराजी उंबरे, रामेश्वर पिराजी उंबरे व संतोष पिराजी उंबरे (तिघे रा. पाथर्डी, नाशिक) अशी या संशयितांची नावे आहेत.
या प्रकरणी स्टोन क्रशर व्यावसायिक गजानन बापूराव नवले (वय ४१) यांनी फिर्याद दिली आहे. दाखल तक्रारीनुसार नवले यांचे आग्रा रोडवरील सारूळ शिवारात गजानन स्टोन क्रशर आहे. वरील तिघांनी २०१८ ते १८ नोव्हेंबर २०२१ या कालावधीत क्रशरमधील काही लोकांशी संगनमत करून स्वतःच्या सात ट्रक क्रशरमध्ये आणून नवले यांच्या क्रशरमधील मालाची त्यांना कुठलीही माहिती न देता चलनविनाच टॅक्स पावती न घेता व घेतलेल्या खडी, डबर, कृत्रिम रेती, बिल्डिंग मटेरिअलचे पैसे देता अंदाजे दोन कोटी ५० लाखांच्या गौण खनिजाची परस्पर बाहेरील बांधकाम व्यावसायिकांना विक्री करून मिळालेल्या पैशातून संशयितांनी एक्स्प्रेस इन हॉटेलपासून पुढे असलेल्या नवले जलसेवेजवळ प्लॉट घेऊन चार मजली इमारत बांधली. तसेच गावी जमीन, तसेच गाड्या, सोने व रोख स्वरूपात पैसा जमवले. याविषयी विचारातच ठार मारण्याची धमकी दिल्याचे नवले यांनी फिर्यादीत म्हटले आहे. सहायक निरीक्षक पाटील तपास करीत आहेत.