इगतपुरी (जि. नाशिक) : सर्वाधिक वर्दळीच्या मुंबई आग्रा महामार्गावरील तळेगाव फाट्यावर अज्ञात टेंम्पोने एका गायीला (Cow) जोरदार धडक दिल्याने गंभीर दुखापत झाल्याने गायीला उठणे व चालणे अशक्य झाले होते. ही घटना समजताच जनसेवा प्रतिष्ठानने पदरमोड करीत गायीला नाशिक येथे गोशाळेत उपचारासाठी नेले. वेळेवर उपचार मिळाल्याने अपघातग्रस्त गायी वेळेवर उपचार मिळून जीवदान मिळाले आहे. (Seva Pratishthan saves cows life Nashik News)

या मदतकार्यात घोटी टॅबचे सहायक पोलिस निरीक्षक अमोल वालझाडे, उपनिरीक्षक हरी राऊत, घोटी पोलिस टॅबचे कर्मचारी राहुल गांगुर्डे, दीपक दांडेकर, सुनील खताळे, पंचायत समितीचे पशुवैद्यकीय अधिकारी तसेच इगतपुरी शहरातील राज जावरे, आकाश सोनवणे, प्रदीप राजपूत, मेहुल शहा, नरेंद्र चांडक, किरण फलटणकर तसेच वडाळा, मुंबई येथील साईभक्त आदींचे सहकार्य लाभले.

चाराटंचाईमुळे भटकंती

तालुक्यात मार्च व एप्रिलच्या सुरूवातीपासूनच तापमानात चांगलीच वाढ झाल्याने वाढत्या तापमानाचा फटका मानवासोबतच तालुक्यातील पशूंनाही बसत आहे. चाराटंचाईमुळे महामार्गालगत असणाऱ्या रायगडनगर, वाडीवऱ्हे, गोंदे, माणिकखांब, खंबाळे, तळेगाव व इतर भागातील पशुधनाची महामार्गालगत हिरव्या व लहान झाडांची पाने खाण्यासाठी वर्दळ वाढू लागली आहे. यामुळे जनावरांना अपघातांचा सामना करावा लागत आहे.