धक्कादायक! तस्करी रॅकेटचा भांडाफोड...दोन पोलिस अधिकाऱ्यांसह आयटी कंपनीमालकाचा समावेश 

नाशिक : काही दिवसांपूर्वी येवला वनपरिक्षेत्रातील गोपनीय माहिती वन विभागाला मिळाली होती. त्यानुसार वनपरिक्षेत्र अधिकारी भंडारी यांच्यासह पथकाने घरावर छापा टाकत संशयितांना ताब्यात घेतले होते. या कारवाईत संशयितासह अल्पवयीन मुलास गजाआड केले होते. चौकशी करताना तस्करी रॅकेटचा भांडाफोड झाला.

तस्करांच्या टोळीचा यामुळे भांडाफोड

मांडूळ आणि मऊ पाठीच्या कासवाच्या तस्करीच्या प्रयत्नातील 18 संशयितांना नाशिक पूर्व वन विभागाच्या पथकाने ताब्यात घेतले आहे. धक्‍कादायक बाब म्हणजे या कारवाईत दोन पोलिस अधिकाऱ्यांसह आयटी कंपनीतील मालकाचा समावेश आहे. येवला तालुक्‍यातील शेतमजुराला अटक केल्यानंतर नाशिकसह नगर, ठाणे, पुण्यातील तस्करांवर पथकाने कारवाई केली आहे. राज्यस्तरावरील तस्करांच्या टोळीचा यामुळे भांडाफोड झाला आहे. पुढील शोधार्थ वाइल्ड लाइफ क्राइम ब्युरोला माहिती देण्यात आली आहे. 

वाइल्ड लाइफ क्राइम सेलकडून तपासणी

येवला वनपरिक्षेत्रातील सत्यगावमधील एका घरात मांडूळ लपविल्याची गोपनीय माहिती वन विभागाला मिळाली होती. त्यानुसार वनपरिक्षेत्र अधिकारी संजय भंडारी यांच्यासह पथकाने घरावर छापा टाकत संशयितांना ताब्यात घेतले होते. या कारवाईत संशयित सोमनाथ रामनाथ पवार (वय 22) याच्यासह अल्पवयीन मुलास गजाआड केले होते. चौकशी करताना तस्करी रॅकेटचा भांडाफोड झाला. उपवनसंरक्षक तुषार चव्हाण आणि सहाय्यक वनसंरक्षक सुजित नेवसे यांनी येवला वनपरिक्षेत्र आणि दक्षता विभागाची दोन पथके अन्य संशयितांना ताब्यात घेण्यासाठी रवाना केली होती. संशयिताने दिलेल्या माहितीनंतर तस्करांचे रॅकेट उघडकीस आले. यात प्रकाश बर्डे, संदीप बर्डे, देवराम जाधव (रा. थेरगाव), अंबादास बापू कुवर (रा. देवळाली कॅम्प), किरण पांडुरंग सोनवणे (रा. मनेगाव), किसन श्रीपत पवार (रा. सिन्नर) आणि संतोष बाळकिसन कचोळे (रा. मऱ्हळ), ज्ञानेश्‍वर विठ्ठलराव वाबळे (रा. नगर), निखिल निवृत्ती गायकवाड (रा. कोल्हापूर), श्रीरामपूर येथील बेलापूरमध्ये मच्छिंद्र दत्तात्रय काळे (रा. डेहरे) व ज्ञानेश्‍वर विठ्ठल गाडेकर (रा. घोडेगाव) यांना ताब्यात घेण्यात आले. 

हेही वाचा > भुजबळ संतापले...अधिकाऱ्यांना घेतले फैलावर...नेमके काय घडले?

पोलिस विभागातील दोन अधिकाऱ्यांचा सहभाग 
संशयितांच्या अधिक चौकशीत मांडूळ विक्रीच्या तयारीतील सहा जणांना सिन्नर-पुणे महामार्गावरील हॉटेलमधून अटक करण्यात आली. यात विशेष म्हणजे रबाळे पोलिस ठाण्याचे सहाय्यक पोलिस निरीक्षक विश्‍वास चव्हाणके आणि पुण्यातील चतुशृंगी पोलिस ठाण्यातील रायटर दीपक धाबेकर, नीलेश रामदास चौधरी (रा. चाकण, आयटी कंपनीमालक), संदीप तान्हाजी साबळे (रा. नारायणगाव), महेश हरिश्‍चंद्र बने (रा. अंबरनाथ) यांना ऑडी व अन्य एक चारचाकी व दुचाकीसह ताब्यात घेण्यात आले. या कारवाईमुळे वन्यजीवांच्या तस्करीच्या प्रयत्नातील राज्यस्तरीय टोळीला जेरबंद करण्यात वन विभागाला यश आले असल्याचे तपासी अधिकाऱ्यांनी सांगितले. दरम्यान, या प्रकरणात पुढील तपासासाठी मेळघाट टायगर रिझर्व्ह क्षेत्रातील वाइल्ड लाइफ क्राइम सेलकडून सर्व संशयितांच्या फोनची तपासणी केली जात आहे.

हेही वाचा > अंधश्रध्देचा खेळ आणि राज्यस्तरीय रॅकेटचा पर्दाफाश..मुंबईतील पोलिस अधिकाऱ्यासह १९ जण सामील