नाशिक : जिल्हाधिकारी कार्यालयातील नगरपालिका शाखेचे सहआयुक्त श्याम गोसावी यांच्या चौकशीचे आदेश जिल्हाधिकाऱ्यांनी दिल्यानंतर त्यांच्याकडे शेकडो प्रकरणे प्रलंबित असल्याचे समोर आले आहे.

पुढील दोन दिवसांत चौकशी अहवाल जिल्हाधिकाऱ्यांना सादर केला जाणार आहे. (Shyam Gosavi inquiry report to Collector in 2 days Nashik News)

पाच सदस्यीय चौकशी समितीकडून नगरपालिका शाखेच्या दफ्तराची गेल्या सप्ताहापासून तपासणी केली जात आहे.

नगरपालिका शाखेत जानेवारी ते सप्टेंबर या ९ महिन्यांत प्राप्त झालेल्या टपालापैकी तब्बल ६५६ कार्य विवरणपत्रे नोंदविली नसल्याचे उघड झाले आहे, तसेच ११ न्यायालयीन संदर्भ प्रलंबित आहेत.

त्यामुळे कामकाजात अनियमितता झाली असल्याचे अपर जिल्हाधिकारी बाबासाहेब पारधे यांच्या अध्यक्षतेखाली सुरू असलेल्या चौकशीत प्रथमदर्शनी उघड झाले आहे.

चौकशी पूर्ण झाल्यानंतरचा हा अहवाल आता संयुक्तरीत्या तयार करून तो निवासी उपजिल्हाधिकारी राजेंद्र वाघ हे अपर जिल्हाधिकारी बाबासाहेब पारधे यांना सादर करतील.

तपासणीवेळी ई-टपाल, वेतन व संवर्ग समावेशन, रजा, विभागीय चौकशा व न्यायालयीन प्रकरणे प्रलंबित असल्याचे उजेडात आले. त्यानंतर पथकाकडून नगरपालिका शाखेकडील आर्थिक व्यवहारांची तपासणी सुरू करण्यात आली.

त्यात नगरपालिकांकडून आलेले कामांचे आर्थिक प्रस्ताव, बिले, निधी वितरणासह नगरपालिकांना मागणीनुसार निधी मिळाला का याची खातरजमा केली जाते आहे. अहवालानंतर जिल्हाधिकारी काय कारवाई करतात याकडे संपूर्ण यंत्रणेचे लक्ष लागले आहे.