नाशिक : (म्हसरूळ) मखमलाबाद शिवारात आसारामबापू पुलाजवळ बागड बिल्डर्स यांच्या सुरू असलेल्या बहुमजली इमारतीचे काम करत असताना बाराव्या मजल्यावरून पडून मजुराचा गुरुवारी (ता. ३) मृत्यू झाला. यामुळे बिल्डिंग साइटवर काम करणाऱ्या बांधकाम मजुरांच्या सुरक्षेचा प्रश्न पुन्हा ऐरणीवर आला आहे. मृत झालेल्या मजुराचे नाव जुनेद रशिद रौफ खान (वय २४) आहे. 

अशी आहे घटना

म्हसरूळ पोलिस ठाणेच्या हद्दीतील आसारामबापू पुलाजवळ बागड बिल्डर यांचे 'नेचर बिलीच' नावाने बहुमजली इमारतीचे काम सुरू आहे. गुरुवारी दुपारी दोन ते पावणेतीनच्या सुमारास वडाळा गावातील सादिकनगर येथील चार नंबर गल्लीत राहणारा खान जुनेद शाहिद रौफ खान हा मजूर बाराव्या मजल्यावर पॉली कोर्बोनेट सीटचे काम करत असताना खाली पडला. याच साइटवरील काम करीत असलेला व जुनेद यांचा बंधू शेख हसिफ अब्दुल रौफ खान यांनी तातडीने जुनैद यास उपचारासाठी कॉलेज रोडवरील खासगी रुग्णालयात दाखल केले. परंतु उपचारादरम्यान जखमी जुनेद याचा रात्री पावणेआठच्या सुमारास मृत्यू झाला. यापूर्वीही नाशिकला बांधकाम साइटवर काम करणाऱ्या मजुरांचे मृत्यू झाले असून, अद्यापही हे कमी होत नसल्याने साहजिकच, इमारत बांधकामांना परवानगी देणारी महापालिका यंत्रणा, कामगार उपायुक्तांसह प्रशासनाच्या कारवाईकडे लक्ष लागले आहे. रात्री उशिरापर्यंत म्हसरूळ पोलिस ठाण्यात गुन्हा दाखल करण्याची प्रक्रिया सुरू होती. 

वैद्यकीय उपचारासाठी रुग्णवाहिकाही नसल्याचा आरोप

दुर्घटनेनंतर संबंधित साइटवर कामकाज करणाऱ्या काही कामगारांशी संवाद साधला असता मजुरांसाठी बिल्डरकडून सुरक्षा साधन पुरवली जातात का? असा उलटा प्रश्‍न करण्यात आला. एकूणच मजुरांना बांधकाम साइटवर काम करताना काळजी घेण्यासाठी काय सुरक्षा साधने असतात. हेच माहिती नसल्याचे 'सकाळ'ला सांगितले. साइटवरून वैद्यकीय उपचारासाठी रुग्णवाहिकाही नसल्याचा आरोप कामगारांनी केला. बांधकाम व्यावसायिक सुरक्षेच्या दृष्टीने काय काय योजना करतात, हे पाहण्याची जबाबदारी कुणाकडे आहे, कोण याकडे लक्ष देतो, हा प्रश्‍न या दुर्घटनेनिमित्ताने पुन्हा उपस्थित झाला आहे. 

हेही वाचा > धक्कादायक! सासरच्यांनीच लेकीचा घातपात करुन विहिरीत फेकल्याचा पित्याचा आरोप; परिसरात खळबळ

या प्रकल्पातील कामगारांची नोंदणी केली नसल्याचे प्रथमदर्शनी समोर आले आहे. त्यामुळे अशा नोंदी न करताच कामगार काम करीत असल्याने त्याबाबत संबंधित अधिकाऱ्यांना कारवाई करण्याच्या सूचना दिल्या आहेत. - विकास माळी, सहाय्यक कामगार आयुक्त 

हेही वाचा > गाई चारायला गेलेल्या प्रशांतच्या नशिबी असे दुर्दैव; घटनेनंतर गावात भयाण शांतता

संपादन - किशोरी वाघ