नाशिक / पेठ : कोरोनामुळे गेल्या अडीच महिन्यांपासून बाजारपेठ बंद होती. सोमवार (ता. 8) पासून शासनाच्या आदेशान्वये बाजारपेठ खुली करण्यात आली. खरीप हंगाम आणि पावसाळ्याची खरेदीसाठी शेतकरी, शेतमजुरांनी येथे प्रचंड गर्दी केल्याने सोशल डिस्टन्सिंगचा फज्जा उडाला आहे. 

गर्दीमुळे सोशल डिस्टन्सिंग वाऱ्यावर 

तालुक्‍यातील दुर्गम-अतिदुर्गम भागातील बहुतांश घरे कौलारू आहेत. त्यामुळे पावसाळ्यापूर्वी नवीन कौले टाकणे, प्लॅस्टिक कागद टाकणे आदी कामे आदिवासी बांधव दरवर्षी करतात. यंदा मात्र पावसाळा सुरू झाला तरीही लॉकडाउनमुळे त्यांना घराबाहेर पडता आले नाही. त्यामुळे लॉकडाउन शिथिल होताच नागरिकांनी पेठ शहरात खरेदीसाठी गर्दी केली. बाजारपेठेत कौले, पत्रे, प्लॅस्टिक कागद, काथ्या, छत्री, पावसाळी चप्पल, गम बूट आदी वस्तू खरेदीची लगबग होती. यासोबतच खरिपाची घाईगर्दी असल्याने शेतकरी शेतीअवजारे फावडे, टिकाव, विळी, कुऱ्हाड, नांगर फाळ, लोखंडी सारळी, दोरखंड, बैलजोते, सऊळ, दुसर आदी खरेदीची दुकाने गर्दीने फुलून गेली. 

हेही वाचा > भीतीदायक! दोघींना पकडून अंधारात खेचत नेले...भय इथले कधी संपणार?..

लॉकडाउनमुळे बोंबीलची आवक कमी 
तालुक्‍यात चार महिने सतत पाऊस पडत असल्याने त्यात शेतीची कामे सुरू होत असल्यामुळे शेतकरी शेतमजुरांस शहरात येणे शक्‍य होत नाही. त्यामुळे आदिवासी बांधव चार महिन्यांचा बोंबील, सुकड, झिंगा आणि खारामासा यांची खरेदी मोठ्या प्रमाणात करतात. मात्र लॉकडाउनमुळे परराज्यांतून येणारा हा माल दळणवळणांच्या असुविधेमुळे न आल्याने मागणीत वाढ असली तरी पुरवठा कमी होत असल्याचे बोंबील व्यावसायिकांनी सांगितले. 

हेही वाचा > वाहनांची वर्दळ कमी..तरीही जाताएत इतके जीव? दुष्टचक्र कधी संपणार?