जुने नाशिक : गेल्या चार दिवसापासून सतत सुरू असलेल्या पावसामुळे (Constant Rain) काझी गढीची माती मोठ्या प्रमाणावर धुतली गेली. शनिवार (ता. १६) रात्री दहाच्या सुमारास गढीची माती ढासळून तुटक्या बंद घराच्या भिंतीचा भाग कोसळला.

काझी गढीचा बहुतांशी भाग धोकादायक झाला आहे. दरवर्षी पावसाळ्यात येथील घरांचा भाग कोसळण्याच्या घटना घडत असतात. (soil of kazi Garhi collapsed nashik Latest Marathi News)

काही रहिवाशांनी तेथून कायमस्वरूपी स्थलांतर केले आहे. ज्यांची आर्थिक परिस्थिती चांगली नाही, असे रहिवासी मात्र अद्यापही या ठिकाणी जीव मुठीत घेऊन वास्तव्यास आहे. गढीची माती पावसाळ्यात धुतली जात असल्याने तो भाग धोकादायक झाला आहे.

शनिवारी सायंकाळी झालेल्या पावसाने रात्री दहाच्या सुमारास गढीच्या काठावरील माती ढासळली. त्यामुळे त्याठिकाणी असलेल्या बंद घराच्या तुटलेल्या भिंतीचा काही भाग खाली कोसळला. पश्चिम विभागाच्या कर्मचाऱ्यांना माहिती मिळताच त्यांनी घटनास्थळी दाखल होत पाहणी केली.

कोसळल्या भागास लागून असलेल्या रहिवाशांना सुरक्षितस्थळी स्थलांतर करण्याचे सांगितले. रहिवाशांनी मात्र कर्मचाऱ्यांवर रोष व्यक्त केला. दरम्यान मध्यरात्रीच्या सुमारास माती ढासळण्याची शक्यता असल्याने कर्मचाऱ्यांनी गढीच्या पायथ्याशी नदीपात्रास लागून असलेला रस्ता बॅरिकेटिंग करून वाहतुकीसाठी बंद केला.

नगरविभागाचे श्री. जोपळे आणि बांधकाम विभागाचे अरुण मोरे यांनी दोन्ही ध्वनीक्षेपणाच्या माध्यमातून परिसरातील नागरिकांना सावधानतेचा इशारा दिला. शिवाय गढीवरील आणि पायथ्याशी वास्तव्यास असलेल्या रहिवाशांना सुरक्षित स्थळी स्थलांतर होण्याच्या सूचना केल्या.