आर्थिक परिस्‍थीती बिकट असल्‍याने उचलले पाऊल; संपादरम्‍यान जिल्‍ह्यातील तिसरा बळी

जळगाव : चार महिन्‍यांपासून सुरू असलेल्‍या एसटी कर्मचारी संप अजूनही मिटलेला नाही. या संपाचा एसटीतील आणखी एका कर्मचारीचा बळी गेला आहे. जळगावात हा प्रकार झाला असून चालकाने रेल्वेखाली स्‍वतःला झोकून देत आत्महत्या केल्याची घटना सकाळी घडली.

राज्‍य परिवहन महामंडळाच्‍या जळगाव विभागातील यावल आगारात चालक पदावर कार्यरत असलेल्‍या शिवाजी पंडित पाटील (वय ४५) यांनी रेल्वेखाली आत्महत्या केली. परिवहन महामंडळातील कर्मचारींच्‍या संपादरम्‍यान आजची आत्‍महत्‍या ही राज्यातील ११४ वी तर जळगाव जिल्ह्यातील तिसरा बळी गेला आहे.

गँगमनच्‍या निदर्शनास आल्‍यानंतर घटना उघड

जळगाव शहरातील शिवाजीनगर स्‍मशानभुमी समोरील खांबा क्रमांक ४२०/२९/अ डाऊन लाईनवर आज सकाळी १० वाजेपुर्वी रेल्वेखाली आल्याने एका व्यक्तीचा मृत्यू झाला. ही घटना साडेदहाच्‍या सुमारास गँगमनच्या निदर्शनास आली. घटनास्थळी शहर पोलीस ठाण्याचे हवालदार करुणासागर जाधव व आरपीएफचे सुरेश मीना हे पोहचल्यानंतर पुढील कार्यवाहीला सुरुवात झाली.

खिशात सापडली सुसाईड नोट

मृतदेहाचे खिसे तपासले असता खिशात एक डायरी मिळून आली. डायरीत असलेले ओळखपत्र आणि सुसाईड नोट वरून मृताची ओळख पटली. माझी मनस्थिती खराब असल्याने मी टोकाचे पाऊल उचलत आहे. माझ्या आत्महत्येशी माझ्या परिवाराचा काहीही संबंध नाही; असा उल्लेख सुसाईड नोटमध्‍ये केला आहे.