पंचवटी (जि. नाशिक) : पेठ नाक्यावरील स्टेट बँकेतून पंधरा दिवसांपूर्वी तिघा संशयितांनी कॅश काउंटरवर जमा असलेली १७ लाख रुपयांची रोकड हातोहात चोरून नेल्याची घटना घडली होती. या घटनेचा तपास सुरू असताना, हे संशयित मध्य प्रदेशमधील असल्याचे निष्पन्न झाले. पंचवटी पोलिस तपास पथक चोरट्यांना पकडण्यासाठी मध्य प्रदेशमध्ये पोचले. चोरीला गेलेल्या १७ लाखांपैकी १४ लाख रुपये हस्तगत करण्यात पोलिसांना यश आले, मात्र एकही संशयित ताब्यात घेतले नसल्याने आश्चर्य व्यक्त केले जात आहे. (stolen money find from SBI by panchavati police nashik Latest Crime News)

२ नोव्हेंबरला ही घटना घडली होती. संशयित रुषी अनुपसिंग छायल याने १७ लाख रुपयांची रोकड हातोहात लंपास केली. यानंतर बँकेत दुसरीकडे उभा असलेला त्याचा साथीदार करण पप्पू सासी व बँकेच्या बाहेर टेहेळणी करीत उभा असलेला नरपतसिंग नथुलाल दफाणी (तिघेही रा. गाव कडीया सासी, ता. पचौर, मध्य प्रदेश) हे फरार झाले. घटनेचा वरिष्ठ निरीक्षक डॉ. सीताराम कोल्हे यांच्या मार्गदर्शनाखाली तपास सुरू असताना, संशयित मध्य प्रदेशमधील असल्याचे समोर आले.

पथक संशयितांच्या गावी संशयितांना अटक करण्यासाठी पोचले. पण संशयित फरार असल्याने, संशयितांच्या कुटुंबीयांकडून पोलिसांनी बँकेतून चोरलेल्या १७ लाख रुपयांपैकी १४ लाख रुपये हस्तगत केले. याबाबत गुरुवारी (ता.१७) पंचवटी पोलिस ठाण्यात उपायुक्त किरणकुमार चव्हाण यांनी पत्रकार परिषद घेऊन माहिती दिली. दरम्यान, घटनेतील फरार संशयित पोलिसांच्या रडारवर असून लवकरच त्यांना जेरबंद केले जाणार असल्याचे यावेळी चव्हाण यांनी सांगितले.

गावात सर्वच गुन्हेगार प्रवृत्तीचे

स्टेट बँक सारख्या बँकेतून एवढी मोठी रक्कम चोरीला जाते, यावरून स्थानिक गुन्हेगार यांचाही समावेश असण्याची शक्यता आहे. मध्य प्रदेशमधील असलेले हे तिघेही संशयित सराईत गुन्हेगार असून आहेत.

संशयित राहत असलेल्या गावात सर्वजण अशाच गुन्हेगारी प्रवृत्तीचे असल्याने गुन्हेगारांना अटक करण्यासाठी गेलेल्या पोलिसांवर हे नागरिक हल्ला करीत असल्याचे या वेळी पोलिस उपायुक्त किरणकुमार चव्हाण यांनी सांगितले.