नाशिक : लॉकडाउन काळात महिला बचतगटांच्या माध्यमातून निर्माण होत असलेले उत्पादन पूर्णपणे थंडावल्याने आर्थिक अडचण निर्माण झाली आहे. महिला बचतगटांनी ज्या वित्तिय संस्थांकडून कर्ज घेतले, त्यांनी वसुलीसाठी तगादा लावल्याने गरीब महिला आर्थिक अडचणीत सापडल्या आहेत. त्यामुळे महिला बचतगटांकडून कर्जवसुली थांबविण्याची मागणी आमदार सीमा हिरे यांनी जिल्हाधिकारी सूरज मांढरे यांच्याकडे केली. 

लॉकडाउनच्या काळात अनेक उद्योग व्यवसाय, छोटे मोठे व्यवसाय बंद पडल्याने या काळात अनेकांना रोजगाराला मुकावे लागले. त्यात महिला बचतगटांनाही लॉकडाउनचा फटका बसला. महिला बचतगटांनी व्यवसायासाठी कर्ज घेतले आहे. आर्थिक दुर्बल घटकातील या महिलांकडे कर्जवसुलीसाठी तगादा लावला जात होता. त्यापार्श्‍वभूमीवर आमदार हिरे यांच्याकडे महिला बचतगटांनी तक्रार केली. आमदार हिरे यांनी जिल्हाधिकारी सूरज मांढरे यांची भेट घेऊन निवेदन दिले. वित्तिय संस्थांनी कर्जवसुलीसाठी तगादा लावल्यास थेट संपर्क करण्याचे आवाहन जिल्हाधिकार्यांनी केले. या वेळी नगरसेविका छाया देवांग, अर्चना दिंडोरकर, जान्हवी बिरारी, सरिता पाटील, रेखा गोसावी, रचना गायकवाड, मंगल देवरे, रेखा शेलार या उपस्थित होत्या. 

हेही वाचा > धक्कादायक! रक्षकच जेव्हा भक्षक बनतो तेव्हा; पोलिस पतीसह पाच जणांकडून पत्नीचा छळ

हेही वाचा > ह्रदयद्रावक! अखेरच्या क्षणीही मैत्रीचा घट्ट हात कायम; जीवलग मित्रांच्या एकत्रच निघाल्या अंत्ययात्रा