सोग्रस (जि. नाशिक) : दहावीच्या परीक्षेत कमी गुण मिळाल्याने बिहार राज्यातील १६ वर्षीय मुलाने गळफास घेऊन आत्महत्या केल्याची घटना शुक्रवारी (ता. १) सोग्रस येथे घडली.

चांदवड तालुक्यातील सोग्रस येथील एव्ही ब्रॉयलर कंपनीत कामगार असलेल्या नातेवाईकाकडे मनीषकुमार लल्लनराव यादव (वय १६, रा. कटहरिया, ता. ब्राहिम, जि. गोपालगंज, बिहार) हा मुलगा आलेला होता. दहावी परीक्षेचा निकाल त्याने कॉम्प्यूटरवर बघितला. परिक्षेत त्याला कमी गुण मिळाल्याचे लक्षात आल्यानंतर नैराश्‍यातून त्याने ब्रॉयलर कंपनीतील कामगार बिल्डींगमधील जिन्यात सकाळी ११ च्या सुमारास दोरीने गळफास घेऊन आत्महत्या केली. घटनेची माहिती एव्ही ब्रॉयलर कंपनीच्या व्यवस्थापकांनी वडाळी भोई पोलिसांना दिली. पोलिसांनी त्वरित घटनास्थळी हजर होऊन मृतदेह वडाळी भोई शासकीय रुग्णालयात उत्तरीय तपासणीसाठी दाखल केला. वैद्यकीय अधिकाऱ्यांनी मनीषकुमार यास तपासून मृत घोषित केले.

दरम्यान, दुपारी चारच्या सुमारास मनीषकुमारचा मृतदेह त्याच्या मूळगावी अंतिम संस्कारासाठी पाठविण्यात आला. यासंदर्भात वडाळीभोई पोलिस ठाण्यात नोंद करण्यात आली असून, पोलिस अधिकारी कैलास इंद्रेकर. श्री. कराड, श्री. घुमरे करीत आहे.