येवला (जि. नाशिक) : गत सप्ताहात येवला व अंदरसूल मार्केट यार्डवर उन्हाळ कांदा (Summer Onion) आवक टिकून राहिली. मात्र बाजारभावात सुधारणा झाली. या सप्ताहात दरात थोडीशी सुधारणा होऊन कमाल १७०० रुपये, तर सरासरी १२०० रुपये दर मिळाला. (Summer onion has a maximum market price of Rs 1700 an average of Rs 1200 Nashik News)

उन्हाळा कांद्यास देशांतर्गत उत्तर प्रदेश, बिहार, पश्चिम बंगाल, आसाम, ओडिशा, दिल्ली, पंजाब, तमिळनाडू, केरळ, कर्नाटकात व परदेशात मागणी सर्वसाधारण होती. कांदा आवक ४३ हजार ९३३ क्विंटल झाली असून उन्हाळ कांद्याचे बाजारभाव २५० ते १७००, तर सरासरी १२०० रुपये प्रतिक्विटल होते. तसेच उपबाजार अंदरसूल येथे उन्हाळ कांद्याची आवक २३ हजार ५५८ क्विटल झाली. उन्हाळ कांद्याचे बाजारभाव २०० ते १६०० तर सरासरी ११५० रुपये प्रतिक्विटल होते. दरात सुधारणा होत असली तरी अजूनही वाढ होण्याची प्रतीक्षा असून हा दरदेखील परवडणारा नसल्याची भावना शेतकरी व्यक्त करत आहेत. यामुळे बाजारात आवक स्थिर आहेत

सप्ताहात गव्हाच्या आवकेत घट झाली. बाजारभाव स्थिर राहिले. गव्हास व्यापारी वर्ग व देशांतर्गत मागणी सर्वसाधारण राहिल्याने बाजारभाव एक हजार ७९९ ते दोन हजार ४५० रुपये तर सरासरी २१०० रुपयांपर्यंत होते. बाजरीच्या आवकेत घट झाली. बाजारभाव १९२५ ते २३४० तर सरासरी १९७५ रुपयांपर्यंत होते. हरभऱ्याची आवक टिकून होती. बाजारभाव ३५०० ते कमाल ५५०० तर सरासरी ४३५१ रुपये

प्रतिक्विटल होते. सोयाबीनच्या आवकेत घट झाली. स्थानिक व्यापारी वर्गाची मागणी सर्वसाधारण राहिल्याने बाजारभाव स्थिर होते. बाजारभाव प्रतिक्विटलला ४४०० ते ६५७५, तर सरासरी ६३८० रुपयांपर्यंत होते. मकाच्या आवकेत घट झाली, तर व्यापारी वर्गाची मागणी सर्वसाधारण राहिल्याने बाजारभाव स्थिर होते. मक्याची आवक ९२ क्विटल झाली असून, बाजारभाव २००० ते २३३० तर सरासरी २२५० रुपये प्रतिक्विटल पर्यंत होते, अशी माहिती बाजार समितीचे सचिव के. आर. व्यापारे यांनी दिली.