नाशिक : देशात सतत महिलांवरील अत्याचाराच्या गंभीर घटना घडत असल्याचं वृत्त समोर येते. मात्र, जेव्हा रक्षकच भक्षक बनतो, तेव्हा काय? अशीच एक घटना घडली आहे अहमदनगरमध्ये...अखेर त्या पोलीसाला नाशिकला गजाआड केले आहे. (Suspended-police-inspector-arrested-nashik-marathi-news)

जेव्हा रक्षकच भक्षक बनतो, तेव्हा काय?

नगर येथील कोतवाली पोलिस ठाण्याचे निरीक्षक विकास वाघ कार्यरत असताना वादग्रस्त ठरले होते. त्यादरम्यान तेथील उपनगरातील एका महिलेने त्यांच्याविरोधात बलात्काराची तक्रार दिली होती. बलात्काराच्या तक्रारीनंतर संबंधित पीडित महिलेने संशयित वाघ यांच्याकडून धमकावले जात असल्याची दुसरी तक्रार दिली होती. त्यात त्यांना अटकही झाली होती. मात्र, बलात्‍काराच्या गुन्ह्यानंतर ते फरारी झाले होते. नगरचे पोलिस अधीक्षक मनोज पाटील यांच्या मार्गदर्शनाखाली त्यांचा तपास सुरू होता, त्यात तांत्रिक तपासादरम्यान संशयित वाघ नाशिकला असल्याची माहिती मिळाली. त्यावरून नगरचे पथक नाशिकला दाखल झाले. त्यानंतर पोलिस निरीक्षक गायकवाड, सहाय्यक हवालदार सय्यद शकील, अविनाश वाकचौरे, सचिन जगताप आदींनी वाघ यांना सापळा रचून जेरबंद केले. यादरम्यान त्यांची नगरच्या पोलिस पथकाशी झटापटही झाली.

नाशिक पोलीसांची कारवाई

नगर येथील तोफखाना पोलिस ठाण्याचे निरीक्षक सुनील गायकवाड व त्यांच्या नेतृत्वाखालील पथकाने नाशिकला भद्रकाली पोलिस ठाण्याच्या हद्दीत येऊन संशयित निलंबित निरीक्षक वाघ यांना अटक केली. त्यांच्याविरोधात बलात्कारचा गुन्हा दाखल झाला असून, साधारण तीन महिन्यांपासून ते फरारीच होते.