नाशिक : महापालिकेच्या पाच जलतरण तलावाचे एकूण २८७२ सभासदांचे शुल्क माफ करण्याचा निर्णय महासभेत घेण्यात आला आहे. कोरोनाकाळात दोन वर्ष जलतरण तलाव बंद असल्याने शुल्क माफीचा निर्णय घेण्यात आला. (Swimming pool membership fees 20 lakh waived by NMC Nashik Latest Marathi News)

शहरात महानगरपालिकेचे चार जलतरण तलाव आहे. यातील स्वातंत्र्यवीर सावरकर जलतरण तलाव येथे १७३५, नाशिक रोड येथील राजमाता जिजाऊ आंतरराष्ट्रीय दर्जाच्या जलतरण तलावात ५७६, सातपूर जलतरण तलाव ४१२, सिडकोच्या स्वामी विवेकानंद जलतरण तलाव येथे १४९ असे एकूण २८७२ आजीव सभासद आहे. या सभासदांकडून वार्षिक प्रतिसभासद ३५० रुपये देखभाल शुल्क घेतले जाते.

२०२०-२१ व २०२१- २२ या दोन आर्थिक वर्षात कोविडमुळे जलतरण तलाव बंद करण्याच्या सूचना राज्य शासनाकडून देण्यात आल्या होत्या. मात्र, आता जलतरण तलाव नियमित सुरू करण्यात आले आहे. त्यामुळे दोन वर्षाचे प्रतिव्यक्ती मिळून ७०० रुपये देखभाल शुल्क आकारण्याचा निर्णय घेण्यासाठी महासभेवर प्रस्ताव सादर करण्यात आला होता. परंतु, कोरोनाकाळात दोन वर्षे जलतरण तलाव बंद असल्याने शुल्क वसूल करणे अयोग्य असल्याची भूमिका मांडण्यात आल्यानंतर आयुक्त डॉ. पुलकुंडवार यांनी शुल्क माफ करण्याचा निर्णय घेतला.