नाशिक : जिल्ह्यात चालू आर्थिक वर्ष २०२२-२३ मध्ये खरीप आणि रब्बी पीक कर्ज (Kharif & Rabbi Crop Loan) वाटपाचे सुमारे ३ हजार ६५० कोटी रुपयांचे उद्दिष्ट निश्चित करण्यात आले असल्याची माहिती जिल्हा अग्रणी बँक (District Leading Bank) व्यवस्थापक आर. आर. पाटील यांनी दिली. मागील वर्षी २०२१-२२ मध्ये ३ हजार ५३५ कोटीच्या उद्दिष्टापेक्षा चालू वर्षी सुमारे ११५ कोटींनी पीक कर्ज वाटप वाढीचे उद्दिष्ट वाढविण्यात आले आहे. त्यामध्ये खासगी बँकेच्या (Private Banks) कर्जवाटपाच्या उद्दिष्टात ५९ कोटीने वाढ करण्यात आली आहे. (Target of Rs 3650 crore for kharif rabi crop loan Nashik News)

दरवर्षी जिल्ह्याची अग्रणी बँक असलेल्या बँक ऑफ महाराष्ट्र यांच्याकडून पीक कर्ज वाटपाची उद्दिष्ट ठरविले जाते. उद्दिष्ट अंतिम झाल्यानंतर जिल्हाधिकारी स्तरावरही आढावा होऊन त्यास अंतिम स्वरूप देण्यात येते. २०२२-२३ मध्ये जिल्ह्यातील एकूण दोन लाख ३४ हजार ३३७ खातेदार शेतकऱ्यांना पीक कर्ज वितरण्याचे उद्दिष्ट ठेवण्यात आले आहे. उद्दिष्टपूर्तीच्या अनुषंगाने एप्रिल २०२२ मध्ये १७ हजार २ खातेदारांना २५३ कोटी १९ लाख रुपये इतके पीक कर्ज वाटप झाले आहे. गतवर्षीपेक्षा चालू वर्षी जिल्हा बँकेस १८ कोटी, राष्ट्रीयकृत बँकांना ४५ कोटी, खासगी बँकांना ५२ कोटी रुपयांनी उद्दिष्ट वाढवून देण्यात आले आहे.

रब्बीसाठी ८०३ कोटी

पिककर्जासाठी ठेवण्यात आलेल्या ३ हजार ६५० उद्दिष्टांपैकी यंदाच्या खरिपात २०२२ मध्ये २ हजार ८४७ कोटी आणि रब्बी पिकासाठी ८०३ कोटीचे आहे. गतवर्षी २०२१ मध्ये अनुक्रमे दोन हजार ७८० आणि ७५५ कोटी असे ३ हजार ५३५ कोटी रुपये उद्दिष्ट होते. चालू वर्षीच्या उद्दिष्टात खरिपासाठी ६७ कोटी आणि रब्बीसाठी ४८ कोटी अशी ११५ कोटींनी वाढ करण्यात आली आहे.

२०२२-२३ साठी खरीप व रब्बी पीक कर्ज वाटप उद्दिष्ट

बँकेचे नाव लक्षांक (रक्कम कोटीत)

जिल्हा बँक ५७९ कोटी २३ लाख

राष्ट्रीय बँका २ हजार ४६२ कोटी ६८ लाख

ग्रामीण १० कोटी ३१ लाख

खासगी ५९७ कोटी ७५ लाख