नाशिक/इगतपुरी : पाच सप्टेंबर हा दिवस शिक्षक दिन म्हणून साजरा करण्यात येतो पण इगतपुरी तालुक्यातील कनिष्ठ महाविद्यालयीन शिक्षकांवर हा दिवस काळा दिवस  म्हणून साजारा करण्याची वेळ आली आहे.

निकाली काढण्याचे आश्वासन

कनिष्ठ महाविद्यालयीन शिक्षक महासंघाच्या आदेशानुसार इगतपुरी तालुका कनिष्ठ महाविद्यालयीन शिक्षक संघाच्या वतीने विविध प्रलंबित मागण्यांचे निवेदन शुक्रवार ( ता.4 रोजी ) तहसीलदार परमेश्वर कासुळे यांना देण्यात आले. निवेदनात म्हटले आहे की, ता.18 फेब्रुवारी रोजी शिक्षणमंत्री यांच्या समवेत झालेल्या बैठक विविध विषयांवर चर्चा होऊन एक महिन्यात महासंघाचे प्रश्न निकाली काढण्याचे आश्वासन त्यांनी दिले होते मात्र कोणतीही कार्यवाही झालेली नाही.

हेही वाचा > धक्कादायक! सासरच्यांनीच लेकीचा घातपात करुन विहिरीत फेकल्याचा पित्याचा आरोप; परिसरात खळबळ

शिक्षक दिन काळा दिवस

या विषयी अनेक वेळा आंदोलने, वेळोवेळी निवेदने देऊनही अद्यापही कोणतेही आदेश काढले नसल्याने शिक्षक दिनीच काळा दिवस म्हणून पाळावा लागणार असल्याचे कनिष्ठ महाविद्यालयीन शिक्षक महासंघाचे प्रदेशाध्यक्ष तथा जिल्हाध्यक्ष प्रा.डॉ.संजय शिंदे यांनी निवेदनात म्हटले आहे. यावेळी प्रा.वैशाली कोकाटे, प्रा.शिवाजी चव्हाण, प्रा.अरुण वाघ, प्रा.राजेंद्र गायकवाड, प्रा. उल्का सोनवणे, प्रा.डि.ए.गायकवाड उपस्थित होते.

 या आहेत प्रमुख मागण्या 

1) मूल्यांकन पात्र घोषित शाळा वाढीव तुकड्या तथा अघोषीतला निधीसह घोषित करून सर्वांचा निधी वितरणाचा आदेश निर्गमित करावा.
2) दशकाहून अधिक काळ विना वेतन वाढीव पदावर कार्यरत शिक्षकांना पद मंजुरी व वेतन अनुदान द्यावे.
3) गेली 20 वर्षापासुन विनावेतन कार्यरत आय.टी शिक्षकांना त्वरित वेतन अनुदान द्यावे.
4) 1 नोव्हेंबर 2005 पूर्वी टप्पा अनुदानावर नियुक्त शिक्षकांवर जुन्या पेन्शनबाबत झालेला अन्याय दूर करावा, तसेच नंतर सेवेत दाखल झालेल्या शिक्षकांना जुनी पेन्शन योजना लागू करावी.
5) राज्य सरकारी कर्मचारी यांचे प्रमाणे 10,20,30 वर्षाची आश्वासित प्रगती योजना शिक्षकांना लागू करावी. 

हेही वाचा > गाई चारायला गेलेल्या प्रशांतच्या नशिबी असे दुर्दैव; घटनेनंतर गावात भयाण शांतता

संपादन - रोहित कणसे