नाशिक : फेब्रुवारीचा दुसरा आठवडा प्रेमाचा आठवडा ‘व्हॅलेंटाइन डे’ म्हणून साजरा केला जातो. आपल्या आवडत्या व्यक्तीला तसेच प्रियजनांना प्रेमाचे प्रतीक म्हणून गुलाबपुष्पांची भेट देत एकमेकांचे नाते साजरे करण्याचे हे क्षण. फूल उत्पादनात गुलशनाबाद म्हणून नाशिकची ओळख असून, यंदाच्या ‘व्हॅलेंटाइन डे’ निमित्त नाशिकच्या ‘टॉप सिक्रेट’ गुलाबाला देशभर मागणी वाढली आहे.

कोरोना निर्बंध शिथिल केल्यामुळे ‘व्हॅलेंटाइन डे’ मोठ्या उत्साहात साजरा होत आहे. फुलांचे माहेरघर असलेल्या नाशिकच्या गुलाबाचे उत्पादन पुन्हा बहरले आहे. कोरोनाकाळात गत दोन वर्षापासून फुलांची मागणी कमी झाल्याने गुलाब उत्पादक शेतकऱ्यांचे मोठे नुकसान झाले होते. परंतु, जानेवारीच्या शेवटच्या आठवड्यापासून नाशिकच्या शेतकरी उत्पादकांकडे मुंबई, दिल्लीतील व्यापाऱ्यांनी मागणी केल्याने गुलाबाला तेजी निर्माण आली आहे.

पांढरा, गुलाबी, पिवळ्या यासह लाल रंगांचे गुलाब प्रसिद्ध आहे. ‘व्हॅलेंटाइन डे’ ला लाल गुलाबाचे मोठे आकर्षण असते. कर्नाटकातील बेंगळुरूनंतर महाराष्ट्रातील पुणे, नाशिकमधील पॉलिहाऊस फूल शेतीसाठी देशात प्रसिद्ध असून, यातील नाशिकच्या गुलाबाला देशभर मागणी आहे. तपोवन परिसरात वर्षभर गुलाबाचे उत्पादन घेत असलेल्या धीरज जेजूरकर या शेतकऱ्याने वीस गुंठे शेतीत पॉलिहाऊस तयार केले.

''वीस गुंठ्यांतील जागेत वर्षभर गुलाबाचे उत्पादन घेत आहे. लग्नसराईसह सण उत्सव मोठ्या प्रमाणावर साजरे होत असल्याने यंदा गुलाबाला मागणी वाढली आहे. गुलाबाच्या पॅकिंगला पाच रुपये खर्च येत असून, गुलाबाला चांगला बहर असल्याने दिल्ली, मुंबई, अहमदाबाद, जयपूर यासह देशभरात नाशिकचा गुलाब पाठविला जात आहे.''

- धीरज जेजूरकर, गुलाब उत्पादक शेतकरी