नाशिक : कोरोनाच्या पार्श्‍वभूमीवर मुंबई विमानतळावर विशेष वैद्यकीय पथकाकडून चीनमधून येणाऱ्या प्रवाशांचे स्कॅनिंग केले जात आहे. त्यात आतापर्यंत एकही रुग्ण पॉझिटिव्ह आढळून आलेला नाही, तसेच कोरोनासंदर्भात मांसाहाराविषयी सुरू असलेला अपप्रचार चुकीचा असून, बिनधास्तपणे मांसाहार करावा, असे मत आरोग्यमंत्री राजेश टोपे यांनी येथे व्यक्त केले. 

राज्यात कोरोनाचा एकही रुग्ण नाही - आरोग्यमंत्री राजेश टोपे
संदर्भसेवा रुग्णालयास भेट दिल्यानंतर आरोग्यमंत्री टोपे बोलत होते. ते म्हणाले, की चीनमध्ये वुहान या प्रांतामध्येच कोरोनाचा प्रादुर्भाव आहे. तरीही चीनमधून येणाऱ्या प्रत्येक प्रवाशाची मुंबई विमानतळावर बारकाईने आरोग्य तपासणी केली जात आहे. काही दिवस त्यांना विशेष शिबिरात ठेवून वैद्यकीय चाचण्या घेतल्या जात आहेत. आतापर्यंत एकही रुग्ण पॉझिटिव्ह आढळलेला नाही. विशेष शिबिरातून तो प्रवासी सोडल्यानंतरही आरोग्य विभागाकडून त्याचे ट्रॅकिंग केले जात आहे, जेणेकरून शिबिरातून गेल्यानंतर काही त्रास झाल्यास त्यास तत्काळ आरोग्यसेवा उपलब्ध असावी, हा त्यामागील हेतू आहे. मात्र अद्यापपर्यंत तसे काहीही घडलेले नसल्याचे टोपे यांनी सांगितले. 

हेही वाचा > भयंकर! इमारतीच्या गेटवर नाव भलतेच..अन् आतमध्ये चालायचा "धक्कादायक' प्रकार..

आरोग्यमंत्री राजेश टोपे यांचा बिनधास्त मांसाहार करण्याचा सल्ला 

तसेच, सोशल मीडियाच्या माध्यमातून मांसाहारातून कोरोनाचा प्रसार होत असल्याचे संदेश अफवा आहेत. मांसाहारातून कोरोनाचा प्रसार होत नाही. मांसाहार करणाऱ्यांनी अजिबात घाबरून जाण्याचे कारण नाही. त्यांनी बिनधास्तपणे मांसाहार करण्याचेही आवाहन आरोग्यमंत्री टोपे यांनी या वेळी केले.  

हेही वाचा > ज्या आईच्या उदरातून जन्म घेतला, त्यावरच 'त्याने' घाव घातला...