नाशिक/मनमाड : शहरात जॉगिंग ट्रॅक नसल्याने मनमाडकरांना सध्या "समस्यांच्या ट्रॅक'वरून चालावे लागत आहे. त्यामुळे सुदृढ आरोग्य ठेवण्यासाठी वृद्धांना जीव मुठीत घेऊन रस्त्यालाच जॉगिंग ट्रॅक समजून वॉक करावे लागत आहे. 

मैदानांना कचरा कुंडीचे स्वरूप

लॉकडाउनमुळे जिम, व्यायामशाळा आणि फिटनेस सेंटर बंद आहेत. शहरात जॉगिंग ट्रॅक नसून डॉ. बाबासाहेब आंबेडकर रेल्वे क्रीडांगण व महर्षी वाल्मिकी स्टेडियम ही दोन मैदाने आहेत. मैदानांना कचरा कुंडीचे स्वरूप आले आहे. अतिक्रमणाने मैदाने गिळली आहेत. कोरोनामुळे आठवडेबाजार बंद करून मैदानावर भाजी बाजार भरवीत असल्याने कचरा साचतो. त्यामुळे दुर्गंधी सुटते. वाघदर्डी रस्ता, रापली, नगरचौकी, लासलगाव, शिंगवे, डोणगाव, मालेगाव, येवला, चांदवड, नांदगाव रस्ता यांसह इतर मैदान, मोकळ्या जागांवर वृद्धांसह तरुणाई सकाळी- सायंकाळी फिरताना दिसते. यातील अनेक रस्ते, मैदाने खडबडीत आहेत. चालताना पाय घसरणे, मुरगळणे, चमक भरणे आदी प्रसंग घटतात.

विकासासाठी लोकप्रतिनिधींनी प्रयत्न करणे गरजेचे

गाड्यांची वर्दळ असल्याने अपघात होण्याची शक्‍यता असते. रस्त्यासह सर्वच मैदानांवर पथदीप नाहीत. मोकाट कुत्रे, जनावरे, टवाळखोरांचा तेथे राबता असतो. पोलिसांची गस्त नसल्याने अंधाराचा फायदा घेत मद्यपी मद्य रिचवतात. अनेक ठिकाणी बसण्यासाठी बाक नाही. ट्रॅकच्या विकासासाठी लोकप्रतिनिधींनी प्रयत्न करणे गरजेचे आहे. आरोग्याबाबत सजग असलेल्या मनमाडकरांना सध्या समस्यांच्या ट्रॅकवरून चालावे लागत असल्याने तीव्र संताप व्यक्त होत आहे. 

हेही वाचा > अंत्यविधीची सुरू होती तयारी...अन् 'ती' एक बातमी येताच सगळ्यांनाच फुटला घाम..

जॉगिंग ट्रॅक नसल्याने वृद्धांसह तरुणांना खडबडीत रस्त्यावर रनिंग, वॉक करावे लागत आहे. मैदान व अन्य ठिकाणी जॉगिंग ट्रॅक केल्यास सर्वांनाच फिटनेसमध्ये राहता येईल. - प्रवीण व्यवहारे, क्रीडाशिक्षक 

जॉगिंग ट्रॅक नसल्याने आम्हाला रस्त्याने वॉक करावे लागते. गाड्यांची वर्दळ असल्याने अपघात होण्याची शक्‍यता असते. थकल्यावर बसण्यासाठी बाक नाही. पालिका प्रशासनाने जॉगिंग ट्रॅक तयार करून बाक बसवावेत. - कृष्णा जी पगारे, ज्येष्ठ नागरिक 

हेही वाचा > धक्कादायक! लहान भावाने मोठ्या भावाच्या डोक्यात घातला दगड..जागीच ठार...कारण वाचून व्हाल थक्क..