नाशिक : त्र्यंबकेश्वर तालुक्यातील साप्ते गावाजवळील शिवाजीनगर पाझर तलावात बुडून बुधवारी (दि.१८) तीन बालिकांचा मृत्यू झाल्याची धक्कादायक घटना घडली. या घटनेने परिसरात शोककळा पसरली आहे.

अशी घडली घटना...

साप्ते गावापासून चार किलोमीटर अंतरावर असलेल्या शिवाजीनगर पाड्यावर राहणाऱ्या सोनू बेंडकोळी यांच्या मुली जिजा सोनू बेंडकोळी (९), धनश्री सोनू बेंडकोळी (७) तसेच स्वप्नीली यशवंत बेंडकोळी (५) या तीघी जवळील एका पाझर तलावाजवळ खेळताना पाण्यात आंघोळीसाठी उतरल्या असता बुडाल्याचे प्रथमदर्शनी समोर येत आहे. यावेळी त्यांच्यासोबत गावातीलच अंगणवाडीत शिकणारी बालिकाही होती. या तीघी पाण्यात बुडल्याचे लक्षात येताच त्या बालिकेने गावात येऊन आई-वडिलांना ही माहिती दिली. त्यानंतर गावकऱ्यांनी धाव घेत तीन्ही चिमुकलींचे मृतदेह बाहेर काढले. घटनेची माहिती हरसूल पोलिसांना सरपंच राजू बेंडकोळी यांनी दिली.

हेही वाचा > माणसातच शोधा आता देव...कारण, 'मंदिर'च बंद!...इतिहासात घडतंय पहिल्यांदाच

दोन्ही बहीणी गेल्याने कुटुंबावर आभाळ फाटले​...

काही वेळेतच पोलिस घटनास्थळी दाखल झाले. तीन्ही मृतदेहांचा पंचनामा करून हरसूल पोलिसांनी मृतदेह जिल्हा शासकिय रुग्णालयात शवविच्छेदनासाठी हलविले. यामध्ये बेंडकोळी कुटुंबातील दोन्ही चिमुकल्यांचा मृत्यू झाल्याने कुटुंबीयांमध्ये आक्रोश पाहायला मिळत आहे. या दोन्ही बहीणी पेठ तालुक्यातील शासकिय आश्रमशाळेत शिकत होत्या. तसेच स्वप्नाली ही अंगणवाडिकेत अक्षरओळखचे धडे गिरवित होती. घटनेची माहिती मिळताच आमदार हिरामण खोसकर यांनी जिल्हा शासकिय रुग्णालयात धाव घेतली. याप्रकरणी हरसूल पोलिस ठाण्यात नोंद करण्यात आली आहे. 

हेही वाचा > 'तू काळजी नको रे करु, तुझं काम असं झटक्यात करतो'...अन् केलं काही भलतंच