रेडगाव खुर्द (जि. नाशिक) : चांदवड तालुक्यात शुक्रवारी (ता. ३०) सायंकाळी वादळी वाऱ्यासह तुफान पाऊस झाल्याने पिकांचे अतोनात नुकसान झाले. आसरखेडे गावाच्या निम्म्या भूभागावर जोरदार गारपीट झाल्याने या ठिकाणी पिके पूर्णपणे गारांनी खरडली जाऊन नुकसान झाले. तालुक्यात महिनाभरापासून पडत असलेला पाऊस चांदवडकरांची पाठ सोडायला तयार नसल्याने चांदवडची कांदापंढरी उद्धव झाली आहे.

शुक्रवारी सायंकाळच्या सुमारास आसरखेडे, मतेवाडी, देणेवाडी, मंगरूळ आदी गावांत वादळी पाऊस झाला. त्यात प्रामुख्याने आसरखेडे येथे सर्वाधिक नुकसान झाले. येथील बाजीराव रकीबे यांच्या गाईवर बाभळीचे झाड पडल्याने गाय दबली जाऊन बेशुद्ध झाली. मात्र, प्रसंगावधान राखत शेतकऱ्यांनी फांद्या तोडून गायीला बाहेर काढले.

अनेक ठिकाणी झाडे उन्मळून पडली. विजेचे पोल, शेड उडाले. जोराचा वारा असल्याने शेतकऱ्यांची धावपळ उडाली. गारांमुळे कांदा पिकाला पातच राहीली नाही. उसाचेही नुकसान झाले. यामुळे शेतकरी हतबल झाला असून, तत्काळ नुकसान भरपाई मिळण्याची मागणी शेतकऱ्यांनी केली आहे.