जुने नाशिक : मेनरोड येथील पूर्व विभागीय कार्यालयाच्या धोकादायक भागाच्या दुरुस्तीसाठी महापालिकेस अखेर मुहूर्त सापडला. धोकादायक भागात वाढलेल्या वृक्षापासून कामाची सुरवात करण्यात आली आहे. कार्यालयाची भिंत आणि कार्यालय पहाडमुक्त दिसणार आहे. (Time to repair dangerous part of Eastern Divisional Office Nashik News)

ब्रिटिशकालीन पूर्व विभागीय कार्यालयाची इमारतीच्या मागील बाजूच्या भिंतीत पिंपळाचे वृक्ष वाढले होते. त्यामुळे भिंतीस मोठा तडा गेला आहे. चार वर्षांपूर्वी मुसळधार पावसात त्यातील दगड कोसळण्याची घटना घडली होती.

अन्य भागही मोठ्या प्रमाणावर धोकादायक झाला होता. भविष्यात त्यातून मोठा अपघात घडण्याची शक्यता होती. मंगळवारी (ता.७) धोकादायक भाग दुरुस्तीस महापालिकेला मुहूर्त सापडला.

ठेकेदाराकडून सर्वप्रथम खचलेल्या भागातील वृक्षतोड करत धोकादायक भाग दुरुस्ती कामाची सुरवात केली. पूर्व विभागीय कार्यालयातील कर्मचाऱ्यांसह धोकादायक भाग परिसरातील व्यावसायिकांनी तसेच नागरिकांनी समाधान व्यक्त केले.

हेही वाचा : प्राप्तिकरासाठी निवडा तुमच्या सोयीची प्रणाली

पंधरा ते वीस दिवसात दुरुस्तीचे काम पूर्ण होणार असल्याची माहिती ठेकेदाराकडून देण्यात आली. परंतु इमारतीच्या दुरवस्थेमुळे आणि इमारतीची भिंत खचण्याचा प्रकाराने नाराजीचे सूर पसरले होते.

धोकादायक भागाची दुरुस्ती करण्याऐवजी त्यास मुरूम आणि वाळू भरलेल्या गोण्यांचा पहाड बनवून टेका देण्यात आला होता. पहाडही काही वर्षांनी धोकादायक झाला. प्रत्यक्षात दुरुस्तीच्या कामास सुरवात झाल्याने पहाड हटवण्यात येणार असल्याने इमारत पुन्हा एकदा पहाडमुक्त होणार आहे.