इगतपुरी : मुंबई- नाशिक महामार्गावरील कसारा घाटवर चढून आल्यावर चालत्या ट्रकने अचानक पेट घेतल्याने काही काळ वाहतुक ठप्प झाली होती.

मंगळवार (ता. ५ रोजी ) रात्री १० वाजेच्या सुमारास मुंबईहुन नाशिकच्या दिशेने घाटातून भंगार घेऊन ट्रक येत होता. (Truck burn due to short circuit at nashik mumbai highway nashik news)

या ट्रकने कसारा घाट पार केल्यानंतर अचानक पेट घेतला. घटनेची माहिती मिळताच इगतपुरी नगर परिषद व महिंद्रा अँड महिंद्रा कंपनीच्या अग्निशमन दल घटनास्थळी दाखल होत, आग विझविण्याचे प्रयत्न सुरू करून आग आटोक्यात आणली.

शॉर्ट सर्किटमुळे ट्रकने पेट घेतल्याचा अंदाज पोलिसांनी व्यक्त केला. आग लागल्यानंतर काही काळ वाहतुक ठप्प झाल्याने पोलीसांनी खबरदारीचा उपाय म्हणून वाहतूक नाशिक मुंबई महामार्गावरून वळवून मुंबई ते नाशिक जाणारी वाहतूक लेन बंद केली होती.