नाशिक : कोविड रुग्णालयात कार्यरत परिचारिकांना आवश्यक विविध सुविधा व मागण्यांसाठी जिल्हा, तसेच राज्यभरातील परिचारिकांनी बुधवारी आंदोलन केले. नाशिकला जिल्हा रुग्णालयात झालेल्या आंदोलनात परिचारिकांनी शासनाचा निषेध करीत, दोन तास कामबंद ठेवले. 

दोन तास कामबंद आंदोलन
जिल्हा रुग्णालयाच्या प्रवेशद्वारावर बुधवारी (ता. २६) सकाळी सर्व परिचारिकांनी घोषणाबाजी केली. मागण्या पूर्ण करण्याची मागणी करत शासनाचा निषेध नोंदविला. त्यानंतर तर दोन तास कामबंद आंदोलन केले. यानंतर जिल्हा शल्यचिकित्सक डॉ. सुरेश जगदाळे यांना निवेदन दिले. कोविड रुग्णालयात काम करणाऱ्या परिचारिकांना सात दिवस काम व सात दिवस क्वारंटाइन करावे. कोविड रुग्णालयात पीपीई किट घालून आठ तसा काम करणे त्रासदायक होत असल्याने पीपीई किट घातल्यानंतर चार तासांचे काम असावे, कोविड रुग्णालयासाठी परिचारिकांची भरती करावी, बाहेरगावच्या परिचारिकांच्या राहण्याची व्यवस्था करावी.

हेही वाचा > पहाटेची वेळ...मंदिरात आश्रयाला थांबलेले गुराखी दुर्गंधीने अस्वस्थ; शोध घेताच बसला धक्का

पीपीई किट घालून आठ काम करणे त्रासदायक

मुंबईप्रमाणे कोविड रुग्णालयात कार्यरत परिचारिकांना ३०० रुपये दररोजचा भत्ता दिला जावा. पीपीई किटसह सर्व साधनसामग्री उच्च दर्जाची व पुरेशा प्रमाणात मिळावी, कोविड रुग्णालयात काम करणाऱ्या परिचारिकांची सातत्याने स्वॅब तपासणी करावी. त्यांच्यासाठी २० टक्के खाटा रिक्त ठेवाव्यात, कोविड रुग्णालयात काम करताना परिचारिकेचा मृत्यू झाल्यास तत्काळ ५० लाखांचा विमा तिच्या कुटुंबीयांना मिळावा, बंधपत्रित व प्रभारी परिचारिकांना कायमस्वरूपी सेवेत घेण्यात यावे आदी मागण्या करण्यात आल्या आहेत. जिल्हा नर्सेस असोसिएशनच्या अध्यक्षा पूजा पवार, कार्याध्यक्षा सीमा टाकळकर, सरचिटणीस कल्पना पवार, लता परदेशी, शोभा सोनवणे, विशाल सोनार आदींसह परिचारिका सहभागी झाल्या.  

हेही वाचा > भरचौकात 'त्याने' थेट वाहतूक पोलिसाच्याच श्रीमुखात भडकावली...नेमके काय घडले?

संपादन - ज्योती देवरे