Nashik Electricity Problem: दिपावली सणानिमित्त वीज पुरवठा सुरळीत राहील असे महावितरणने जाहीर केले होते. मात्र, पंचवटीतील मखमलाबाद, आडगाव शिवारात सकाळी किंवा संध्याकाळच्या वेळेत वीज पुरवठा खंडित होत असल्याचे समोर आले आहेत.

यामुळे ऐन दिवाळीत नागरिकांना अघोषित भारनियमनाला सामोरे जावे लागत असून वीजेचा लपंडाव सुरू आहे. (Unannounced load shedding of electricity in panchavati nashik news)

पंचवटीतील मखमलाबाद, आडगांव या परिसरातील अनेक भागात सातत्याने वीज जाण्याचे प्रमाण वाढले आहे. या अघोषित भारनियमनामुळे नागरिक हवालदिल झाले आहेत. मखमलाबाद परिसरातील अनेक कॉलनी भागात दोन दिवसांपासून सकाळ व सायंकाळी लाईट नसल्याने व्यावसायिकांना तसेच नागरिकांना अनेक अडचणी येत होत्या.

मखमलाबाद परिसरातील रामकृष्ण नगर, शांती नगर, गामणे मळा, पार्थ कॉलनीसह अनेक ठिकाणी दररोज रात्री १ वाजेच्या सुमारास २ ते ५ मिनिट वीज पुरवठा खंडित होत असतो. परंतु ऐन लक्ष्मी पूजनाच्या दिवशी पहाटे जवळपास दोन तास तर रात्री जवळपास दिड ते दोन तास वीज पुरवठा खंडित झाला होता.

या वीज पुरवठा खंडित बाबत नागरिकांना कोणत्याही प्रकारची सूचना देण्यात आलेली नव्हती. तसेच काही तांत्रिक कामामुळे जर महावितरणकडून वीज पुरवठा खंडित झाला असेल किंवा होणार असेल तर त्याचा ग्राहकांच्या नोंदणीकृत मोबाईलवर मेसेज येतो. परंतु कोणत्याही प्रकारचा मेसेज न देता महावितरणकडून अशा रात्री मध्यरात्रीच्या अघोषित भारनियमनामुळे परिसरात अनेक चोरीच्या घटना घडत आहे.

या महावितरणच्या भोंगळ कारभाराविषयी नागरिकांकडून तीव्र नाराजी व्यक्त केली जात आहे. सणांच्या दिवसात जर महावितरणकडून शहरातील विशिष्ट परिसरात असे अघोषित भारनियमन केले जात असेल तर त्या संबंधित अधिकाऱ्यांवर योग्य ती कारवाई करण्याची मागणी नागरिकांकडून केली जात आहे.