नाशिक : आरोग्य शिक्षणाचे पदवीपूर्व विद्यार्थ्यांचे पुढील वर्षाचे शैक्षणिक सत्रास प्रारंभ करण्यासंदर्भात विद्यापीठाचे प्रति-कुलपती तथा वैद्यकीय शिक्षणमंत्री अमित देशमुख यांनी निर्देश दिले आहेत. मंगळवारी (ता. २१) झालेल्‍या ऑनलाइन बैठकीत या संदर्भातील महत्त्वपूर्ण निर्णय घेण्यात आला आहे. तसेच विद्यापीठाशी निगडित अन्‍य सूचना श्री. देशमुख यांनी केल्‍या.

वैद्यकीय शिक्षणमंत्र्यांच्या सूचना 

महाराष्ट्र आरोग्य विज्ञान विद्यापीठाच्या विद्यार्थ्यांचे पुढील वर्षाचे शैक्षणिक सत्राबाबत विचारविनीमय, सविस्तर चर्चा करण्यासाठी वैद्यकीय शिक्षणमंत्री अमित देशमुख यांच्या अध्यक्षतेखाली ऑनलाइन बैठक झाली. बैठकीस विद्यापीठाचे कुलगुरू डॉ. दिलीप म्हैसेकर, प्रति-कुलगुरू डॉ. मोहन खामगावकर, वैद्यकीय शिक्षण आणि संशोधन संचालनालयाचे संचालक डॉ. तात्याराव लहाने, आयुष विभागाचे संचालक वैद्य कुलदीप राज कोहली, कुलसचिव डॉ. कालिदास चव्हाण, परीक्षा नियंत्रक डॉ. अजित पाठक, विद्यापीठाच्या विविध विद्या शाखेचे अधिष्ठाता डॉ. सचिन मुंब्रे, डॉ. जयंत पळसकर, डॉ. श्रीकांत देशमुख, डॉ. धनाजी बागल, डॉ. राजश्री नाईक आदी सहभागी झाले होते. 

प्रलंबित प्रश्न लवकरच मार्गी लावणार

श्री. देशमुख म्‍हणाले, की कोविड-१९ आजाराचा प्रादुर्भाव पहाता, तसेच विद्यार्थ्यांचे शैक्षणिक नुकसान होऊ नये, यासाठी विविध सकारात्मक निर्णय घेण्यात येत आहेत. आरोग्य शिक्षणातील विद्यार्थ्यांचे पुढील वर्षाचे शैक्षणिक सत्र सुरू करावे. विद्यार्थ्यांची प्रत्यक्ष उपस्थिती कोविड-१९ आजाराच्या प्रादुर्भावामुळे शक्य नसल्यास ऑनलाइन किंवा ऑफलाइन पद्धतीने वर्ग घेतले जावे. याबाबत विद्यापीठाने संलग्नित महाविद्यालयांना सूचित करावे. विद्यापीठाचे अधिकारी व कर्मचारी यांना सातवा वेतन आयोग लागू करणे यांसह अन्य शासन स्तरावरील प्रलंबित प्रश्न लवकरच मार्गी लावणार असल्याचेही त्यांनी सांगितले. 

हेही बघा > अरेच्चा! तर हे रहस्य आहे काय मालेगावमधून कोरोना संपुष्टात येण्याचं?...भन्नाट व्हिडिओ एकदा पाहाच!

अधिक माहिती खालील संकेतस्थळावर प्रसिद्ध करणार

परीक्षा नियंत्रक डॉ. पाठक म्‍हणाले, की विद्यापीठाचे प्रति-कुलपतींनी दिलेल्या निर्देशानुसार विद्यापीठाकडून त्वरित कार्यवाही करण्यात येईल. याबाबत अधिक माहिती विद्यापीठाच्या संकेतस्थळावर लवकरच प्रसिद्ध करण्यात येईल. शिक्षक, पालक, विद्यार्थी व सर्वांनी कोविड-१९ करिता शासनाने निर्देशित केलेल्या प्रतिबंधात्मक नियमांचे पालन करावे. आरोग्याची काळजी घ्यावी, असे आवाहन कुलगुरू डॉ. म्हैसेकर, प्रति-कुलगुरू डॉ. खामगावकर, कुलसचिव डॉ. चव्हाण यांनी केले आहे. परीक्षेसंदर्भात अधिक माहिती विद्यापीठाचे www.muhs.ac.in संकेतस्थळावर प्रसिद्ध केली जाणार आहे. 

हेही बघा >VIDEO : कृषीमंत्री कोरोनाबाधितांसोबत तीन पावली नृत्यावर थिरकतात तेव्‍हा.. व्हिडीओ होतोय प्रचंड व्हायरल!