म्हसरूळ (जि. नाशिक) : पंचवटीतील हनुमानवाडी येथे घराबाहेर लावलेल्या तीन कारच्या काचा अज्ञातांनी फोडल्याची घटना शुक्रवारी (ता. २४) समोर आली आहे. याबाबत पंचवटी पोलिस ठाण्यात अज्ञातांविरुद्ध गुन्हा (Crime) दाखल करण्यात आला आहे. या घटनेमुळे परिसरातील नागरिकांमध्ये दहशतीचे वातावरण निर्माण झाले आहे. (Unidentified persons smashed glass of 3 four wheelers Nashik Crime News)

निवृत्ती तुकाराम मौले (५४, रा. राजदर्शनी अपार्टमेंट, हनुमानवाडी) यांनी दिलेल्या फिर्यादीनुसार गुरुवारी (ता. २३) रात्री त्यांनी आपली बोलेरो कार (एमएच- १७- व्ही- ८०५३) घराबाहेर उभी केली होती. त्याचप्रमाणे बाजूच्या इमारतीमध्ये राहणारे नागरे यांनी आपली फोर्ड फिएस्टा कार (एमएच- १५- डीएम- ३४९७) व अमोल येलमामे यांची टाटा मॅजिक कार (एमएच- १८- एए- २१५७) घराबाहेर उभी केली होती . शुक्रवार नेहमीप्रमाणे कारमालक घराबाहेर आले असता, त्यांना या तीनही वाहनाच्या काचा अज्ञात टवाळखोरांनी फोडून टाकल्याचे दिसून आले. मौले यांनी या घटनेची माहिती तत्काळ पंचवटी पोलिस ठाण्याला माहिती देत गुन्ह्याची नोंद केली आहे. पोलिस अधिकाऱ्यांनी घटनास्थळी धाव घेत पाहणी केली असून, पोलिस अधिक तपास करत आहेत.