नाशिक :  कोरोना संसर्गावर पुढील वर्षात लस येणार असल्याने लसीकरणासाठी महापालिकेने कर्मचारी व सेवकांची नोंद करण्यास सुरवात केली आहे. त्यानुसार सहा हजार जणांची नोंदणी करण्यात आली असून, शहरात २१ केंद्रांवर लसीकरण केले जाईल. प्रत्येक केंद्रावर पाच कर्मचाऱ्यांचे पथक असेल. लसीकरणाची मोहीम व्यापक प्रमाणात राबविण्यासाठी खासगी रुग्णालयांची मदत घेतली जाणार असून, त्यासाठी ३७४ व्हॅक्सिनेटर नियुक्त केले जाणार आहे, अशी माहिती आयुक्त कैलास जाधव यांनी दिली.
 
नाशिकच्या बातम्या वाचण्यासाठी येथे क्लिक करा 

कोरोनाला प्रतिरोध करणारी लस पुढील वर्षात बाजारात उपलब्ध होईल. त्यादृष्टीने लसीकरणासाठी राज्य शासनाने महापालिकेला सूचना दिल्या आहेत. लसीकरणासाठी प्रथम कर्मचारी व सेवकांची नियुक्ती केली जाईल. लसीकरण करताना प्रशिक्षण देणे आवश्यक असल्याने सात नोडल अधिकाऱ्यांच्या माध्यमातून प्रशिक्षण दिले जाईल. जानेवारीच्या शेवटच्या आठवड्यात लस उपलब्ध होण्याचा अंदाज आहे. त्यादृष्टीने महापालिकेला सज्जतेचे आदेश देण्यात आले आहेत. त्याअनुषंगाने दोन हजार वैद्यकीय सेवक व खासगी रुग्णालयांतील चार हजार सेवक, असे सहा हजार जणांची नोंदणी करण्यात आली आहे. लसीकरणाची व्याप्ती वाढत जाईल, त्याप्रमाणे सेवकांची संख्या वाढविली जाईल. महापालिकेचे चार रुग्णालये, सतरा आरोग्य केंद्रांत लसीकरण केले जाणार आहे. प्रतिदिन १०० लसीकरणाचे उद्दिष्ट ठेवण्यात आले आहे. लसीकरण करणाऱ्या डॉक्टरांना प्रथम डोस दिला जाईल. त्यानंतर आरोग्यसेवक व पोलिसांना लस दिली जाईल. 

ताज्या बातम्या वाचण्यासाठी डाऊनलोड करा ई-सकाळचे ऍप

दुसऱ्या टप्प्यात ३७८ बूथ 

लसीकरणाचे दोन टप्पे तयार करण्यात आले असून, दुसऱ्या टप्प्यात शहरात ३७८ केंद्रे उभारली जातील. दुसऱ्या टप्प्यात प्रतिदिन चार हजार नागरिकांना लस दिली जाईल. दुसऱ्या टप्प्यातील लसीकरणासाठी ३७४ व्हेक्सिनेटर नियुक्त केले जाईल. १०० बेडपेक्षा मोठ्या रुग्णालयांमध्येही लसीकरण केले जाईल.