सिडको (जि. नाशिक) : सिडको परिसरातील वरद विनायक गणपती उद्यानाची दयनीय अवस्था झाली असून या उद्यानातील खेळण्या तुटलेल्या अवस्थेत असून येथील ग्रीन जिम फक्त नावाला उरलेली असल्याचा आरोप स्थानिकांमधून करण्यात आलेला आहे. (Varad Vinayak Ganapati Udyan in CIDCO Toys in broken condition Nashik News)

वरद विनायक गणपती उद्यानातील झोके तुटलेल्या अवस्थेत असून रहिवासीयांनी याबाबत अनेकदा तक्रारी करूनही प्रशासन या बाबीकडे लक्ष देत नसल्याचा आरोप केला आहे. उद्यानातील लॉन्सवर गरजेपेक्षा जास्त पाणी मारले जात असून मोठ्या प्रमाणावर चिखल तयार होत असतो. लहान मुलं खेळायला आले तर याच चिखलात त्यांना खेळावे लागत असल्याने संताप व्यक्त करण्यात येत आहे.

स्थानिक रहिवासीयांसाठी असलेल्या ग्रीन जिमची दयनीय अवस्था झाली असून अनेक साहित्य मोडलेल्या स्थितीत आहेत. त्याची देखिल दुरुस्ती होत नसल्याने उद्यानातील मंदिरात देवदर्शन करून इतर ज्या उद्यानात खेळणी सुस्थितीत असतील, अशा ठिकाणी रहिवासी त्यांच्या मुलांना घेऊन जात असल्याचे सांगण्यात आले.

उद्यानात खेळणी तुटलेल्या अवस्थेत
शोभेच्या झाडांनी मान टाकली
लॉन्स वर गरजेपेक्षा जास्त पाणी मारण्यात येते
उद्यान परिसरात मद्यपिंचा वावर
ग्रीन जिम उरली नावाला
नागरिक इतर उद्यानात घेऊन जाणे करतात पसंत

"उद्यानात खेळणी तुटलेल्या अवस्थेत असून काही खेळणी सुस्थितीत आहेत. परंतु ज्या तुटलेल्या आहेत त्यांची दुरुस्ती होणे गरजेचे असून उद्यान विभाग याकडे सोईस्कर दुर्लक्ष करत आहे."
- सोनाली विश्वकर्मा, गृहिणी

"उद्यानातील शोभेच्या वृक्षाणं कधी खत टाकायला पाहिजे, मात्र जी वृक्ष वाढतील तीच राहत असून इतर अनेक वृक्षानी मान टाकली आहे. वृक्षांची देखभाल करणे देखिल उद्यान विभागाचेच काम आहे, मात्र या बाबीकडे लक्ष दिले जात नाही."- अनिता सोनवणे, गृहिणी

"उद्यानातील लॉन्सवर गरजेपेक्षा जास्त पाणी मारले जात असून येथे मोठ्या प्रमाणावर चिखल तयार होत असतो. अशा चिखलात लहान मुले कसे खेळतील हा प्रश्न उपस्थित राहत आहे."

- सुनील शिरसाठ, रहिवासी

"उद्यानातील ग्रीन जिम केवळ नावापुरता उरली असून अनेक साहित्याची मोडतोड झालेली आहे. मनपा प्रशासनाने जातीने लक्ष देऊन हे साहित्य दुरुस्त करावे अन्यथा नवीन बसवून द्यायला हवे." - अंकित सिंग, रहिवासी