Nashik Crime News : जिल्हा शासकीय रुग्णालयातील ऑक्सिजन प्लांटजवळ पार्क केलेल्या वाहनांची कंत्राटी कर्मचाऱ्याने तोडफोड केल्याचा प्रकार समोर आला आहे. याप्रकरणी कर्मचाऱ्यांनी संताप व्यक्त केला जात असून संबंधित कर्मचाऱ्याने यापूर्वीही असे प्रकार केलेले आहेत.

मात्र जिल्हा रुग्णालयाच्या प्रशासनाकडून कोणतीही कारवाई होत नसल्याने त्याची मुजोरी वाढत असल्याचा आरोप कर्मचाऱ्यांनी केला आहे. दरम्यान, सदरचा प्रकार सीसीटीव्ही कॅमेऱ्यात कैद झाला आहे. (Vehicle vandalized by civil hospital servant Nashik Crime News)

हेही वाचा : संतुलित आहारातून रोखा फॅटी लिव्हरचा आजार

सतीश आहिरे (रा. मेरी, पंचवटी) असे संशयित कंत्राटी कर्मचाऱ्याचे नाव असून आहे. आहिरे यास कोरोनाकाळात बालकांच्या अतिदक्षता विभागात स्वच्छता कर्मचारी म्हणून सामावून घेण्यात आले होते.

मात्र कोरोनानंतर त्याची तात्पुरती नेमणूक जिल्हा रुग्णालयाच्या पाठीमागे असलेल्या ऑक्सिजन प्लांट येथे करण्यात आलेली आहे. आहिरे याने बुधवारी (ता. ३) सकाळी नऊच्या सुमारास मद्याच्या नशेत रुग्णालयातील कार्यरत अधिपरिचारिका आशा वाघ यांनी पार्क केलेल्या अॅक्टिव्हा मोपेडचे स्पीडमीटर दगडाने फोडले.

तसेच, दोन्ही चाकांची हवा काढून नुकसान केले. सतीश करीत असलेला सदरचा प्रकार ऑक्सिजन प्लांटबाहेरील सीसीटीव्ही कॅमेऱ्यात कैद झाला आहे. त्यानुसार वाघ यांनी स्वच्छता निरीक्षकांकडे लेखी तक्रार केली आहे.

मात्र अद्यापही संशयित आहिरेवर जिल्हा रुग्णालय प्रशासनाकडून कोणतीही कारवाई केलेली नाही. त्यामुळे जिल्हा रुग्णालय प्रशासन आहिरेवर काय कारवाई करते, याकडेच कर्मचाऱ्यांचे लक्ष लागले आहे.