Nashik News : केंद्र सरकारने अनुसूचित जमातीच्या लोकसंख्येच्या गावासाठी आदर्श गाव संकल्पनेवर आधारित एकात्मिक, आर्थिक व सामाजिक विकासासाठी पंतप्रधान आदि आदर्श ग्राम योजना सुरु केली.

त्यासाठी राज्यात ग्रामस्तरीय अभिसरण समिती स्थापन करण्यासाठी सरकारने निर्णय घेतला. (Village Level Convergence Committee for Tribal Population Village Nashik News)

सरपंच या समितीचे अध्यक्ष असतील. ग्रामपंचायतीमधील सर्व आदिवासी सदस्य, अंगणवाडी सेविका-सेवक, आशा सेविका, ए. एन. एम., पंचायत राज आणि सार्वजनिक बांधकामाची यंत्रणा, नरेगा योजनेत काम करणारे, शिक्षक, संबंधित विभागाचे प्रतिनिधी, ग्रामविकास अधिकारी तथा ग्रामसेवक, आवश्‍यकतेनुसार राज्यस्तरीय तांत्रिक सहाय्य संसाधन संस्थेचे प्रतिनिधी विशेष आमंत्रित यांचा समितीत समावेश असेल. एक आदिवासी सदस्य हे सचिव असतील.

समितीची तीन महिने अथवा आवश्‍यकतेनुसार बैठक होईल. गरजांचे सर्वेक्षण, माहितीचे संकलन, ग्रामविकास आराखडा तयार करणे, अंमलबजावणी करणे, मूल्यमापन आणि संनियंत्रण ही कामे समितीची असतील.