Sahyadri Vineyard Ultra Run : सह्याद्री फार्मर्स प्रोड्युसर कंपनीतर्फे १४ फेब्रुवारीपासून विनियार्ड अल्ट्रा मॅरेथॉनचे आयोजन केले आहे. सर्व गटांसाठी असलेली मॅरेथॉन १८ फेब्रुवारी रोजी सह्याद्री फार्म्स, मोहाडी येथे होणार आहे.

शेत शिवारातून होणारी देशातील सर्वात दीर्घ अंतराची ही एकमेव मॅरेथॉन आहे. (Vineyard Ultra Marathon on area of Sahyadri on 14 february 2024 nashik news)

गेल्या वर्षाच्या उत्स्फूर्त प्रतिसादानंतर यंदा दुसऱ्या वर्षी या मॅरेथॉनचे भव्य आयोजन केले आहे. यंदाही या मॅरेथॉनमध्ये पाच ते ३३८ किलोमीटर पर्यंतचे वेगवेगळे टप्पे ठरविले आहेत. सह्याद्री फार्म्स आणि ब्ल्यू ब्रिगेड यांच्या संयुक्त विद्यमाने होणाऱ्या या स्पर्धेत १४ ते १८ फेब्रुवारी या कालावधीत देशातील तसेच जगातील आंतरराष्ट्रीय धावपटूही सहभागी होतील.

हे अल्ट्रा रनर्स ५०, १०० ते ३३८ किलोमीटर पर्यंतचे अंतर वेगवेगळ्या टप्प्यांत पार करतील. नियमित स्वरूपाची मॅरेथॉन ही १८ फेब्रुवारीला सकाळी ६ वाजता सुरु होईल. त्यामध्ये ५ किमी, १० किमी, २१ किमी आणि ४२ किमी हे महत्त्वाचे टप्पे आहेत. या प्रत्येक टप्प्यात स्पर्धकांना बक्षीसे जिंकण्याची संधी आहे.

यात स्पर्धकांना टी-शर्ट, फळांचे रस, प्रमाणपत्र आणि पदक मिळणार आहे. धावण्याबरोबरच झुंबासारख्या अन्य व्यायाम प्रकारांचाही यात समावेश असेल. स्पर्धेसाठी नाममात्र प्रवेशशुल्क असेल. नागरिकांनी सहभागासाठी सह्याद्री फार्म्सच्या संकेतस्थळावर नोंदणी करता येणार आहे.

''सशक्त शरीरात सशक्त मन असते, या म्हणीप्रमाणे आपल्या प्रत्येकाने शारीरिक आरोग्याचीही योग्य पद्धतीने काळजी घेतली पाहिजे. ही मुख्य भूमिका या उपक्रमामागे आहे. याचा जास्तीत जास्त नागरिकांनी लाभ घ्यावा.''-विलास शिंदे, अध्यक्ष व व्यवस्थापकीय संचालक सह्याद्री फार्मर्स प्रोड्युसर कंपनी, मोहाडी