वावी : वावीसह ११ गावे प्रादेशिक पाणीपुरवठा योजनेचे वीजबिल थकल्यामुळे ‘महावितरण’कडून वारंवार वीजपुरवठा खंडित करण्यात येतो.

योजनेत सहभागी असणाऱ्या गावांकडून योजना चालविण्यासाठी पैसे दिले जात नसल्यामुळे सर्वांत मोठे असलेल्या वावी ग्रामपंचायत क्षेत्रातील ग्रामस्थांना वीजपुरवठा खंडित झाल्यावर नेहमीच पाणीटंचाईचा सामना करावा लागतो.

ग्रामस्थांकडून वेळेवर पाणीपट्टीचा भरणा होत नाही. योजनेतील गावेही प्रतिसाद देत नसल्यामुळे वावीचे सरपंच विजय काटे यांना गावातील सदन व्यक्तींकडून अनामत रकमा घेऊन योजना सुरळीत ठेवण्याचे दिव्य पार करावे लागत आहे. (Water supply scheme in crisis due to electricity bill arrears Efforts to continue scheme by collecting deposits from vavi villagers Nashik)

वावीसह ११ गावे प्रादेशिक पाणीपुरवठा योजना सुरवातीपासूनच चर्चेत आहे. कधी अशुद्ध पाणीपुरवठा, तर कधी वीजबिल न भरल्यामुळे ‘महावितरण’कडून झालेली कारवाई. यातील एक बाब निस्तरावी, तर दुसऱ्या बाबीसाठी पैसे शिल्लक राहत नाही, अशी अवस्था या योजनेची आहे.

सहा महिन्यापासून पंचायत समितीस्तरावर योजनेतील गावांचे सरपंच ग्रामसेवकांची बैठक घेऊन योजनेचा खर्च चालविण्यासाठी गावनिहाय निश्चित केलेला सहभाग देण्यात टाळाटाळ होत आहे.

योजनेत सहभागी अन्य गावे आम्हाला पर्यायी पाणीपुरवठा व्यवस्था आहे, असे सांगतात किंवा गावातील नागरिकांकडून थकबाकी वसूल होत नसल्याचे कारण देऊन योजनेच्या व्यवस्थापन समितीकडे पैसे द्यायला नकार देतात, असे योजनेचे अध्यक्ष व सरपंच काटे यांचे म्हणणे आहे.

सहा महिन्यांत तीनवेळा महावितरणने वीजबिल भरले नाही, म्हणून योजनेचा वीजपुरवठा खंडित केला. प्रत्येकवेळी वावी ग्रामपंचायत शक्य होईल तेवढी रक्कम देऊन वीजपुरवठा सुरळीत करून घेते.

आता दोन दिवसांपूर्वी योजनेचा वीजपुरवठा खंडित झाला आहे. पाण्याअभावी लोकांची गैरसोय होऊ नये, यासाठी सरपंच काटे यांनी गावातील सदन व्यक्तींकडून एक लाख रुपये अनामत रक्कम ग्रामपंचायत खात्यावर भरून घेतली व ‘महावितरण’ला धनादेश देऊन वीजपुरवठा सुरळीत केला.

योजनेचा सर्वाधिक फायदा वावीकरांना झाला आहे. गावासाठी पाणीपुरवठ्याची अन्य पर्यायी योजना नसल्यामुळे नागरिकांनी आपल्याकडील पाणीपट्टी व करांचा भरणा करावा. जेणेकरून पाणीपुरवठा योजना सुरळीत ठेवून संभाव्य पाणीटंचाईतून मार्ग काढता येईल, असे आवाहन सरपंच काटे यांनी केले आहे.

"योजनेतील गावांचे सरपंच व ग्रामसेवक सहभाग हिस्सा द्यायला टाळाटाळ करीत असल्याने एकट्या वावीवर योजनेच्या वीजबिलाचा भार पडला आहे. जवळपास १२ लाख रुपये वीजबिल थकले आहे. महिन्याला सुमारे दीड लाख रुपये वीजबिल येते. प्रत्येक वेळेस ग्रामपंचायत फंडातून वीजबिलाची रक्कम देणे शक्य होत नाही. त्यामुळे गावातील समविचारी युवकांकडून अनामत रकमा घेतल्या व पाणीपुरवठा योजनेचे वीजबिल भरले. अनामत रक्कम एक महिन्यांनी परत करण्याचा संबंधितांना वायदा केला आहे. गटविकास अधिकाऱ्यांनी वारंवार सूचना देऊनही योजनेतील गावे सहकार्य करत नाही. त्यामुळे पुढील काळात योजना चालविणे अवघड आहे."

-विजय काटे, सरपंच, वावी