नाशिक / देवळा : परिसरात अज्ञात रोगाने कडुलिंबाच्या झाडांची पाने वाळू लागल्याने शेतकरी वर्गात व नागरिकांत चिंतेचे वातावरण आहे. कीटकनाशक असणाऱ्या कडुलिंबाच्या झाडांची अशी स्थिती निर्माण झाल्याने आश्‍चर्य व्यक्त होत आहे. 

वनस्पतिशास्त्रज्ञांसाठी हा विषय आता आव्हानाचा

शेतातील पिकांवर जर रोगाचा प्रादुर्भाव दिसू लागला तर शेतकरी लिंबाच्या पाल्याचा, तसेच निंबोळी अर्क यांची त्यावर फवारणी करतात. पण आता त्यावरच रोगाचे आक्रमण म्हणजे आश्‍चर्यच असल्याचे सांगितले जात आहे. एकीकडे कोरोनाने मानवी जीवनचक्र बिघडवून टाकले असताना लिंबाच्या झाडांची पाने वाळू लागल्याने शेतकरी चिंतेत पडले आहेत. शेतकऱ्यांनी या रोगाला "वाळोना' असे नाव दिले आहे. ही झाडे का वाळत आहेत याबाबत संशोधन होऊन उपाययोजना सुचविल्या जाव्यात, अशी मागणी होत आहे. 

हेही वाचा > संतापजनक! "...तर गौरव आज आमच्यात असला असता.."आरोप करत नातेवाईकांनी फोडला हंबरडा..आरोग्य केंद्राची तोडफोड

शेतकऱ्यांकडून अनभिज्ञता
कसमादे पट्ट्यात व येथील परिसरात कडुलिंबाची झाडे मोठ्या प्रमाणात आहेत; परंतु गेल्या दीड-दोन महिन्यांपासून या झाडांची पाने वाळू लागली आहेत. काही पाने हिरवी, काही सुकत आहेत, तर काही पूर्ण वाळली आहेत. याबाबत शेतकऱ्यांना विचारले असता त्यांनी अनभिज्ञता दाखविली. खोडकिडा असल्याचा अंदाज घेतला असता तसेही काही दिसून आले नाही. 

हेही वाचा >प्रेरणादायी..! पत्नी खंबीर.. बेरोजगार व्यावसायिक पतीला दिली अशी साथ...संसाराचा केला स्वर्ग!​

लिंबाची झाडे अर्धवट वाळली

रस्त्याच्या कडेला तसेच शेताच्या बांधावर असणाऱ्या बहुतांश लिंबाची झाडे अर्धवट वाळली आहेत. खोडाचे जवळून निरीक्षण केले असता खोडकिडा दिसून आला नाही. वाळलेल्या पानांवर मात्र काळपट बुरशीजन्य भाग आढळून आला आहे. यामागचे निश्‍चित कारण शोधण्यासाठी प्रयत्नशील आहे. -प्रा. रवींद्र शिरसाठ, वनस्पतिशास्त्र विभाग, कर्मवीर रामरावजी आहेर महाविद्यालय, देवळा