नाशिक : सर्व शहर कोरोनाशी लढताना काही वरिष्ठ नगरसेवक अंग चोरून फक्त सल्लागारच्या भूमिकेत दिसत आहेत. विशेष म्हणजे, वरिष्ठ नगरसेवक महापालिकेच्या कुठल्या ना कुठल्या पदाचे मानकरी ठरले आहेत. ज्येष्ठ म्हणून शहर कोरोनामुक्त करण्यासाठी त्यांच्याकडून पुढाकार घेणे अपेक्षित असताना तेच मागे राहत असल्याने चर्चेचा विषय ठरले आहेत.

सोयिस्करपणे केलं जातंय दुर्लक्ष

शहरात ३१ प्रभाग आहेत. त्यातील पाच प्रभागात एकही रॅपिड ॲन्टिजेन टेस्ट झाली नाही. नगरसेवकांनीही महापालिकेच्या माध्यमातून प्रयत्न केलेले दिसत नाहीत. गेल्या टर्ममध्ये अडीच वर्षे महापौर राहिलेल्या रंजना भानसी पंचवीस वर्षांपासून त्यांच्या प्रभागाचे नेतृत्व करत आहेत. त्या प्रभागात अद्याप एकही रॅपिड ॲन्टिजेन टेस्ट झालेली नाही. शहरात काँग्रेसची जी काही ताकद आहे. त्यात पन्नास टक्के ताकद असलेल्या प्रभाग १२ मध्ये नगरसेवक रोगप्रतिकारशक्ती गोळ्यांचे वाटप करणे, निर्जंतुकीकरण, रुग्णांना खाटा उपलब्ध करून देण्याचे काम करत असले तरी सध्या फक्त रॅपिड ॲन्टिजेन टेस्टची गरज असताना त्याकडे दुर्लक्ष केले जात आहे.

ज्येष्ठ नगरसेवकांकडून एकदाही तपासणी नाही

प्रभाग १३ मध्ये काँग्रेसचे शाहू खैरे, वत्सला खैरे व गजानन शेलार या ज्येष्ठ नगरसेवकांकडून एकदाही तपासणी झाली नाही. प्रभाग १४ हॉटस्पॉट ठरला होता; परंतु तेथे महापालिकेच्या वैद्यकीय पथकाने केलेले प्रयत्न कामी आले. येथे मुशीर सय्यद जुने नगरसेवक आहे. त्यांनीही रॅपिड ॲन्टिजेन टेस्ट घेतली नाही. प्रभाग १५ मध्ये कोरोना रुग्णांची संख्या मोठी असताना भाजपच्या सत्ताकाळात पहिल्याच टर्ममध्ये उपमहापौर झालेले प्रथमेश गिते यांनीही त्यांच्या भागात टेस्ट घेतली नाही. महापौर सतीश कुलकर्णी यांच्या प्रभाग २३ मध्ये वडाळागावातील काही भाग येत असला तरी तेथे महापालिकेने टेस्ट घेत प्रभागात कोरोनाची साखळी खंडित करण्यात यश आले आहे.

हेही वाचा > दुर्दैवी! घरात सॅनिटायझरचा उडाला भडका.. महिला पेटली ..सॅनिटायझेशन करताना हादरवणारी घटना

झोपडपट्ट्यांमध्ये अद्यापही अडचण

शहरात रॅपिड ॲन्टिजेन टेस्ट करण्यामागे कोरोना साखळी तोडण्याचे महत्त्वाचे कारण आहे. विशेष करून झोपडपट्ट्यांमधील नागरिक भीतीपोटी तपासणी करत नसल्याने नगरसेवकांनी प्रशासनाला साथ म्हणून त्या भागातील नागरिकांना घराबाहेर तपासणीसाठी काढण्याची गरज आहे. झोपडपट्टीमध्ये मोठ्या प्रमाणात तपासणी झाल्यास कोरोनाची साखळी खंडित करण्यास मदत होणार आहे. 

हेही वाचा > रक्ताच्या थारोळ्यात 'तो' वेदनेने विव्हळत होता...पण माणुसकी हरली..वाचा काय घडले

(संपादन - किशोरी वाघ)