नाशिक : खरिपाच्या हंगामात भांडवल उभे करताना शेतकरी मोठ्या अडचणीतून जात आहे. अनेक शेतकऱ्यांना बँका प्रतिसाद देत नसल्याने खरीप हंगामासाठी सावकारी अन् खासगी कर्जाची वेळ त्यांच्यावर आली आहे. त्यामुळे हंगाम संपल्यावर पीककर्ज देणार का? अशी संतप्त भावना शेतकऱ्यांकडून व्यक्त होत आहे. 

७२ टक्के शेतकरी पीककर्जापासून वंचित 

खरिपाच्या हंगामात भांडवल उभे करताना शेतकरी मोठ्या अडचणीतून जात आहे. त्यामुळे बँकांकडे पीककर्ज एवढा एकमेव पर्याय शेतकऱ्याकडे आहे. मात्र एकीकडे सरकार म्हणते कर्ज द्या अन् दुसरीकडे बँका उभ्या करत नाही, अशी परिस्थिती आहे. त्यामुळे ७२ टक्के शेतकरी पीककर्जापासून वंचित आहेत. अडचणीच्या कोंडीत सापडलेला शेतकरी विनवण्या करत असताना बँकांसाठी सरकारी आदेश व सूचना नावपुरत्या उरल्याची स्थिती आहे. एकामागून एक संकटे झेलूनही शेतकरी पुन्हा नव्या उमेदीने उभे राहून खरीप हंगामाला सामोरे जात आहे. मात्र, शेतकऱ्यांसमोर मोठी आर्थिक कोंडी झाल्याचे चित्र जिल्हाभर आहे. 

शेतकरी म्हणतात, मंत्र्याचा वचक आहे की नाही!
 
नाशिकसारख्या कृषी क्षेत्रात आघाडीवर असलेल्या जिल्ह्यात दोन कॅबिनेट मंत्री आहेत. त्यांनी खरीप हंगाम आढावा बैठक ते आजपर्यंत खरीप कर्जाला गती मिळावी, अशा बँक प्रशासनाला सूचना केल्या, तर जिल्हाधिकारी सूरज मांढरे यांनी पीककर्ज वितरणात गती यावी, यासाठी प्रत्येक बुधवारी आढावा घेतला जाईल, असे जाहीर केले. मात्र, असे होऊनही त्यास गती नसल्याची स्थिती आहे. त्यामुळे मंत्र्यांचा व प्रशासनाचा वचक उरला नाही, अशी परिस्थिती असल्याने बँका मनमानी करतात, अशी ओरड शेतकरी करत आहेत. 

बँका...लक्ष्यांक (कोटी रुपये)… वितरण(कोटी)...खाती 

राष्ट्रीयीकृत बँका...२२४३.७९...६६३.२५...१७५२८ 
खासगी बँका...६०६.७४...१३३.४६...३८२६ 
ग्रामीण बँका....१६.८७...१.८४...१०८ 
जिल्हा सहकारी बँक...४३७.३७...१२६.५०...६६०६ 
एकूण...३३०३.७६...९२५.०६...२८१३८ 

हेही वाचा > थरारक! बायकोच्या चारित्र्यावर होता नवऱ्याला संशय...मध्यरात्रीच केला 'असा' अंगावर काटा आणणारा प्रकार

कर्जमाफी फक्त नावापुरती झाली आहे. बँकवाल्यांनी शेतकऱ्यांना वेठीस धरले आहे. आता बँकेचे प्रतिनिधी सर्च रिपोर्ट आणा, सर्व नोंदी काढा, सर्व सातबारा उतारे आणा, या अनेक समस्यांनी शेतकरी चिंतेत आहे. कोरोनाचे कारण देत वेळ मारून नेली जात आहे. मग कर्ज हंगाम संपल्यावर मिळणार आहे का? - देवेंद्र काजळे, शेतकरी, कारसूळ (ता. निफाड) 

पीककर्जाचे वाटप हितसंबंध जपून केले जात आहे. बँकेचे प्रशासन उडवाउडवीची उत्तरे मिळतात. विनवण्या करूनही वेळवर पैसे मिळत नसल्याने सावकाराशिवाय पर्याय उरलेला नाही. - अनिल कोठुळे, शेतकरी, पिंपळणारे (ता. चांदवड) 

बँकांचा आढावा घेऊन कामकाज सुरू आहे. त्यानुसार आदेश देण्यात येत आहे. जुलैअखेर कामकाजास गती येईल. - गौतम बलसाने, जिल्हा उपनिबंधक, सहकारी संस्था, नाशिक  

हेही वाचा > दुर्देवी! धरणात पोहण्यासाठी गेलेल्या पोलीसासह दोन मित्रांचा बुडून मृत्यू...परिसरात खळबळ