सुरगाणा (जि.नाशिक) : पती- पत्नी दोघेही त्या दिवशी जेवण करत होते. पण त्यांनाही नाही माहित कि अचानक अशी काही दुर्घटना घडेल आणि सर्वच उध्वस्त होईल. असे काय घडले?
एक दुर्घटना आणि सर्वच उध्वस्त; पिंपळसोंड येथील घटना
पोलिसपाटील रतन खोटरे यांनी सांगितले, की गुरुवारी (ता. ११) दीड ते दोनच्या सुमारास राहीबाई व तिचे पती सोमा गावित घरात जेवण करत असताना अचानक इंदिरा आवास योजनेच्या घरकुलाचे कौलारू छप्पर बाटम, लाकडी जाड वासे, तसेच सागवान लाकडाच्या वजनदार वळ्या
डोक्यावर कोसळल्याने राहीबाईंचा जागीच मृत्यू झाला. पतीला गंभीर दुखापत झाली. याबाबत माजी ग्रामपंचायत सदस्य सोन्या बागूल यांनी सांगितले, की पाच ते सात वर्षांपूर्वी लाभार्थी महिलेस इंदिरा आवास योजनेचे घरकुल मिळाले होते. घरकुलाचा पहिला हप्ता लाभार्थी महिलेस मिळाला. मात्र पुढील हप्ते अद्यापही मिळालेच नाहीत.
पूर्ण घरच ढासळून जमीनदोस्त
आर्थिक परिस्थिती बिकट असल्याने घरकुलाचे बांधकाम पूर्ण करता आले नाही. दुसरे घर नसल्याने अपूर्ण असलेल्या घरातच नाइलाजाने राहावे लागत होते. घरकुलाच्या जोत्यावर (पायावर) पैशाअभावी वीट बांधकाम न करता आल्याने अलगदपणे ठेवलेले खांब कोसळल्याने पूर्ण घरच ढासळून जमीनदोस्त झाले. यातच लाभार्थ्याचा दबून मृत्यू झाला. घरकुलाचे लाभार्थ्यास हप्ते मिळावेत, या मागणीसाठी आदिवासी दलित पँथरचे जिल्हा उपाध्यक्ष तुळशीराम खोटरे यांनी अनेक वेळा धरणे आंदोलन, उपोषण केले व निवेदने दिली आहेत. मात्र अद्यापही घरकुलाचे लाभार्थी वंचितच आहेत.
या आकस्मिक मृत्यूने गावावर शोककळा पसरली आहे. पिंपळसोंड हा भाग गुजरात सीमेलगत असून, अतिदुर्गम आहे. महिलेचे नातेवाईक मजुरीकरिता बाहेरगावी गेले होते. ते आल्यावर रात्री उशिरा मृतदेह शवविच्छेदनाकरिता ग्रामीण रुग्णालयात आणण्यात आला. सकाळी शवविच्छेदन करून मृतदेह नातेवाइकांच्या ताब्यात देण्यात येणार आहे.
इंदिरा आवास योजनेचे घरकुल अंगावर कोसळून घरातच लाभार्थ्याचा मृत्यू झाला, ही दुर्दैवी घटना घडली आहे. याबाबत पंचनामा करण्याचे आदेश तलाठी एम. के. गायकवाड यांना दिले आहेत.
-किशोर मराठे, तहसीलदार
उपचारासाठी रुग्णालयात दाखल
तालुक्यातील बारागाव डांग विभागातील ग्रामपंचायत गोंदुणेंतर्गत पिंपळसोंड येथे इंदिरा आवास योजनेच्या घरकुलाचे छप्पर अंगावर कोसळून झालेल्या दुर्घटनेत राहीबाई सोमा गावित (वय ५३) या महिलेचा घरातच मृत्यू झाला. तिचे पती सोमा गावित (वय ५८) गंभीर जखमी झाल्याने त्यांना उपचारासाठी रुग्णालयात दाखल करण्यात आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.