नाशिक : (येवला) बांधकामापासून वादग्रस्त ठरलेल्या येथील महात्मा फुलेनगरमधील पालिकेच्या घरकुलाचा स्लॅबचा भाग कोसळून शुक्रवारी (ता. 20) महिला किरकोळ जखमी झाली. यामुळे नागरिकांत नाराजी व्यक्त होत आहे. सुधारणा व सुविधा देण्याची मागणी होत आहे. 

अशी आहे घटना

घरकुलाच्या इमारत क्रमांक पाचच्या एका खोलीत सुदर्शन शिंदे यांच्या पत्नी (वय 25) व त्यांचा दीड वर्षाचा मुलगा शुक्रवारी दुपारी तीनच्या सुमारास झोपले होते. खोलीतील स्लॅबचा भाग अचानक कोसळून खाली पडला. मात्र, महिलेने सावधानता बाळगत मुलाला जवळ घेतल्याने मोठी दुर्घटना टळली. घरकुल योजना सुरवातीपासूनच वादात अडकली आहे. निम्म्याहून अधिक घरकुलांचा निधी बांधकाम न होताच परत गेला. झालेल्या बांधकामाचा दर्जा व गुणवत्ता अतिशय हीन आहे. घरकुलांची इमारत पाहिल्यानंतर नागरिक राहतातच कसे, असा प्रश्‍न पडतो. शिवाय आजूबाजूला अस्वच्छता आहे. मोडकळीस आलेल्या इमारतीची दुरुस्ती करावी, यासाठी रहिवाशांनी पालिकेला अनेक वेळा निवेदने दिली. मोर्चेही काढले. मात्र, पालिका प्रशासनाने त्याकडे दुर्लक्षच केले आहे. त्यामुळे ही घटना घडली. 

हेही वाचा >...अन् फोन करायला थांबायचं निमित्त झालं...मागून येऊन 'त्या' दोघांनी काही कळायच्या आतच साधला डाव

या घटनेचे गांभीर्य लक्षात घेऊन पालिकेने सुधारणा न केल्यास रहिवासी उपोषण करतील, असा इशारा आरपीआय (आठवले गट)चे युवक तालुकाध्यक्ष बाळासाहेब कसबे व इतरांनी पत्रकान्वये दिला आहे. अनिल गायकवाड, गणेश गुंजाळ, सुदर्शन शिंदे, सुजाता शिंदे, विमल गायकवाड, जया गायकवाड, पूजा गुंजाळ, अण्णा नागपुरे, प्रकाश नागपुरे, दीपक पवार, आकाश ससाणे, लताबाई पवार यांच्या सह्या आहेत.  

हेही वाचा >.'घबाड आलं हाती अन् कर्मानं केली माती'...मग काय चांगलीच झाली फजिती!