नाशिक : (कळवण) दुपासच्या सुमारास शेतात डबे देऊन युवा शेतकरी घरी परतत होता. चुकीच्या दिशेने येणाऱ्या पिकअपच्या जोरदार धडकेने जबर अपघात झाला. या अपघातात त्या शेतकऱ्याला गंभीर मार लागल्याने त्याचा मृत्यू झाला. याबाबत कळवण पोलीस ठाण्यात मोटार अपघाताचा गुन्हा दाखल करण्यात आला आहे.

अशी आहे घटना

योगेश बाळासाहेब पाटील हा सोमवार (ता. 31) रोजी दुपारी 1.30 वाजता त्यांचा गांगवन शिवारातील शेतात जेवणाचे डबे देण्यास गेला होता. डबे देऊन कळवण येथे दुचाकीवरून (एम एच 41. ए ई 9095) परत येत होता. कळवणकडून मोकभणगीकडे भरधाव वेगाने जाणाऱ्या पिकअप गाडी (एम एच 15. एफ व्ही 3187) ने नाकोडा शिवारातील मोतीराम दादाजी गुंजाळ यांचे शेताजवळ चुकीच्या दिशेला जाऊन जोरदार धडक दिली. यात दुचाकीस्वार योगेश पाटील हा जबर जखमी झाला. जखमी योगेशला योगेश शंकर पगार यांनी ट्रॅक्टरमध्ये घेऊन कळवण येथील उपजिल्हा रुग्णालयात उपचारासाठी आणले. त्यास डोके व हात पाय यास गंभीर दुखापत झाल्याने येथील वैद्यकीय अधिकाऱ्यांनी प्राथमिक उपचार करून अधिक उपचारासाठी नाशिक येथे पाठवले. 

हेही वाचा > धक्कादायक! सासरच्यांनीच लेकीचा घातपात करुन विहिरीत फेकल्याचा पित्याचा आरोप; परिसरात खळबळ

नाशिक येथे उपचारासाठी घेऊन जात असताना वणी गावाजवळ तोंडाला फेस आल्याने वणी येथील खाजगी दवाखान्यात उपचारासाठी नेले. मात्र तेथील डॉक्टरांनी तपासणी करून त्यास मृत घोषित केले. मयत योगेश पाटील यास कळवण येथील उपजिल्हा रुग्णालयात आणून शवविच्छेदन करण्यात आले. याबाबत कळवण पोलीस ठाण्यात मोटार अपघाताचा गुन्हा दाखल करण्यात आला आहे. पुढील तपास पोलीस निरीक्षक प्रमोद वाघ यांच्या मार्गदर्शनाखाली पोलीस संदीप कडाळे व पोलीस घोडे करीत आहेत. 

हेही वाचा > गाई चारायला गेलेल्या प्रशांतच्या नशिबी असे दुर्दैव; घटनेनंतर गावात भयाण शांतता

संपादन - किशोरी वाघ