इंदिरानगर : शुक्रवारी (ता. १८) पाथर्डी फाटा भागातील एक्स्प्रेस इन हॉटेल जवळ शाळकरी मुलींची छेड काढल्याप्रकरणी एका युवकाला या मुलींच्या पालकांनी आणि नागरिकांनी बेदम चोप दिला.

मात्र, गैरसमजातून हा प्रकार घडला असल्याचे इंदिरानगर पोलिस ठाण्याचे वरिष्ठ निरीक्षक संजय बांबळे यांनी सांगितले असून संबंधित युवकाला चौकशीनंतर पालकांकडे सुपूर्द करण्यात आल्याचे सांगितले.

याबाबतचा सर्व प्रकार सोशल मीडियावर व्हायरल झाल्याने खळबळ उडाली आहे. शुक्रवारी दुपारी हॉटेल एक्स्प्रेस इन लगत असणाऱ्या रस्त्याने दोन विद्यार्थिनी रस्त्याने पायी जात होत्या. या वेळी एका तरुणाने मुलींची छेड काढली. (Young man fined for teasing school girls Nashik Crime News)

सदर प्रकार मुलींनी त्यांच्या पालकांना सांगितला असता, तत्काळ घटनास्थळी पालक आले. या वेळी स्थानिक नागरिकांनी एकत्रित येत सदर युवकाला त्याच्या अंगावरील कपडे फाडत बेदम मारहाण करीत चोप दिला.

उपचारार्थ त्याला रुग्णालयात दाखल केले होते. घटनेची माहिती नागरिकांनी इंदिरानगर पोलिसांना कळताच पोलिसही घटनास्थळी हजर झाले व सदर युवकाला ताब्यात घेतले. हा सर्व प्रकार सोशल मीडियावर व्हायरल होत असल्याने खळबळ उडाली आहे.