मालेगाव (जि. नाशिक) : शहराजवळील दरेगाव शिवारातील बीफ कारखान्यासमोरील डोंगरावर इरफान खान गुलाब हुसेन (वय ३३, रा. गुलशेरनगर) या तरुणाच्या डोक्यात दगड घालून त्याचा खून करण्यात आला. संशयिताने पुरावा नष्ट करण्याच्या हेतूने डोके व चेहरा ठेचून मृताची ओळख पटू नये व पुरावा नष्ट व्हावा, असा प्रयत्न केला. शुक्रवारी (ता. १७) रात्री साडेदहाच्या सुमारास हा प्रकार घडला.

याप्रकरणी मिजान अमीन खान (२१, रा. हनफिया सुन्नी मदरस्याजवळ) याच्या तक्रारीवरून पवारवाडी पोलिस ठाण्यात खुनाचा गुन्हा दाखल करण्यात आला आहे. अज्ञात संशयिताने इरफानचा खून केला. खुनाचे कारण समजू शकले नाही. या खुनाचा तपास पोलिसांसमोर आव्हान आहे. खून झाल्याच्या ठिकाणी रक्तमिश्रित माती व २२ ते २५ किलो वजनाचा मुरुमाचा टणक दगड मिळून आला. सुरवातीला या मृतदेहाची ओळख पटू शकली नव्हती. मिजान या दरेगाव शिवारात जेसीबी चालविणाऱ्या तरुणाने मताला ओळखले. प्रारंभी पोलिसांनी बेवारस नोंद केली होती. ओळख पटल्यानंतर मिजानच्या तक्रारीवरून खुनाचा गुन्हा दाखल करण्यात आला. पोलिस निरीक्षक वसंत भोये व सहकारी तपास करीत आहेत.