Nashik Crime News : गेल्या ८ एप्रिलला सापडलेला मोबाईल परत देण्यासाठी गेलेल्या तीस वर्षीय युवकास बेदम मारहाणीचा प्रकार घडला होता. त्यावर रुग्णालयात उपचार सुरु असताना रविवारी (ता. २३) वैद्यकीय अधिकाऱ्यांनी त्यास मृत घोषित केले.

त्यामुळे या प्रकरणी संशयीतांवर खुनाचा गुन्हा दाखल करण्यात आला आहे. (youth injured in beating dies while undergoing treatment Nashik Crime News )

हेही वाचा : संतुलित आहारातून रोखा फॅटी लिव्हरचा आजार

नितीन गणपत जाधव (वय ३०) असे मृत युवकाचे नाव आहे. त्याला ७ एप्रिलला एक मोबाईल सापडला होता. तो परत घेण्यासाठी दुसऱ्या दिवशी सकाळी अकराला सिडकोतील त्रिमूर्ती चौक परिसरात आलेल्या निलेश दिनकर ठोके (वय ३३, रा. कामाठवाडे), प्रसाद शिरीष मुळे व अन्य एका साथीदाराने नितीनला लोखंडी रॉडच्या सहाय्याने जबर मारहाण केली होती.

‘तू माझ्या पत्नीस फोन का करतो’ या कारणाहून ही मारहाण करण्यात आली होती. त्यात गंभीर जखमी झाल्याने नितीनवर रुग्णालयात उपचार सुरु होते. तर, नितीनचे वडील गणपत जाधव यांनी दिलेल्या फिर्यादीनुसार अंबड पोलीस ठाण्यात जबर मारहाणीचा गुन्हा दाखल करण्यात आला होता.

रविवारी नितीनचा मृत्यू झाल्याने संशयितांविरूद्ध खूनाचा गुन्हा दाखल करण्यात आला आहे. पोलिसांनी संशयित निलेश ठोके व प्रसाद मुळे यांना अटक केली असून, पोलीस उपनिरीक्षक सुनील बिडकर तपास करीत आहेत.