नाशिक : जिल्हा परिषद (ZP) व पंचायत समिती (Panchayat Samiti) पंचवार्षिक निवडणुकांसाठी (five year election) उद्या (ता. १३) आरक्षण सोडत कार्यक्रम आयोजित करण्यात आला होता.

मात्र सदर सोडत कार्यक्रम राज्य निवडणूक आयोगाच्या (State Election Commission) आदेशान्वये तूर्त स्थगित करण्यात आला आहे. याबाबत शासनाच्या आदेशानंतर पुढील निवडणूक कार्यक्रम होणार असल्याची माहिती उपजिल्हाधिकारी (पुनर्वसन) नितीन गावंडे यांनी दिली. (ZP Panchayat Samiti stop five year election reservation immediately postponed Nashik Latest Marathi News)

राज्यातील स्थानिक स्वराज्य संस्थांमधील ओबीसी आरक्षणप्रकरणी सर्वोच्च न्यायालयातील मंगळवारी (१२) सुनावणी पूर्ण होऊ शकली नाही. त्यामुळे १९ जुलैला पुन्हा सुनावणी होणार आहे. सुनावणीदरम्यान राज्यात स्थानिक स्वराज्य संस्थांच्या निवडणुकांसंदर्भात तूर्तास कोणतीही नवी अधिसूचना न काढण्याचे आदेश कोर्टाने राज्य सरकारला दिले.

त्यामुळे कोर्टाचा आदेश येईपर्यंत राज्यात कोणत्याही नवीन निवडणुका जाहीर होणार नाही. राज्य सरकारने स्थानिक निवडणुकांसंदर्भात काही अधिसूचना जारी केल्या असतील, तर त्यात हस्तक्षेप करणार नाही, असेही न्यायालयाने निर्देश दिले आहेत.

यासंदर्भात जारी करण्यात आलेल्या शासकीय प्रसिद्धी पत्रकात गावंडे यांनी नमूद केले आहे की, जिल्हा परिषद व पंचायत समिती सार्वत्रिक निवडणुकीसाठी अनुसूचित जाती (महिला), अनुसूचित जमाती (महिला) व सर्वसाधारण (महिला) यांच्या करिता आरक्षण सोडत कार्यक्रम उद्या (बुधवार) घोषित करण्यात आला होता.

परंतु राज्य निवडणूक आयोगाने १२ जुलैच्या निर्देशान्वये त्यास तूर्तास स्थगिती दिली आहे. या संदर्भातील सुधारित आरक्षण सोडत कार्यक्रम यथावकाश घोषित करण्यात येईल, असेही राज्य निवडणूक आयोगाने कळविले असल्याचे उपजिल्हाधिकारी श्री. गावंडे यांनी प्रसिद्धी पत्रकान्वये कळविले आहे.