Nandurbar Crime News : तालुक्यातील आमपाडा चौफुली ते थुंवा गावादरम्यान रस्त्यावर चारचाकीची झडती घेतली असता त्यात एक लाख ३० हजार ५८० रुपयांचे देशी-विदेशी मद्य व बिअरचा मुद्देमाल आढळला. (Navapur police caught illegal liquor stocks with car nandurbar crime news)

या मालासह दोन लाख २५ हजारांची रुपये किमतीची कार (जीजे ०३, एचके ५२२६) नवापूर पोलिसांनी ताब्यात घेतली. संशयित नीलेशभाई ऊर्फ टाइसन रमणभाई कोकणी याला ताब्यात घेऊन नवापूर पोलिसांत गुन्हा दाखल केला.

पोलिस अधीक्षक पी. आर. पाटील यांच्या मार्गदर्शनाखाली नवापूर पोलिस ठाण्याचे प्रभारी निरीक्षक ज्ञानेश्वर वारे यांनी ही कारवाई केली. पोलिस शिपाई समाधान केंद्रे यांनी दिलेल्या फिर्यादीवरून दारूबंदी अधिनियम कलमान्वये नवापूर पोलिस ठाण्यात गुन्हा दाखल झाला. सहाय्यक पोलिस उपनिरीक्षक युवराजसिंग परदेशी करीत तपास आहेत.

पोलिस निरीक्षक ज्ञानेश्वर वारे, सहाय्यक पोलिस उपनिरीक्षक युवराजसिंग परदेशी, हवालदार दिनेशकुमार वसुले, पोलिस नाईक सुरेंद्र पवार, पोलिस शिपाई समाधान केंद्रे, किशोर वळवी यांच्या पथकाने कारवाई केली.